UVIÉU, 22 Abr. (EUROPA PRESS) -
El trabayu nuevu de Dixebra, banda referencial del rock astur, ye'l discu-llibru tituláu 'Ente la niebla' que xira alredor de la historia del movimientu obreru asturianu y que se publica esti vienres.
Nesti trabayu collaboren escritores, historiadores, periodistes y dibuxantes. Ente ellos l'ilustrador Miguel Solís Santos. Asina, nel aspectu gráficu d'Ente la niebla destaquen les once ilustraciones que fixo basaes en lletres de los cantares incluyíos nella.
'Ente la niebla' trata temáticamente la historia del pueblu asturianu del últimu sieglu, dende 1920 a 2020. Esto ye, dende la industrialización del país y el surdimientu d'una clase proletaria asturiana.
Les lletres del discu traten asuntos como la toma de conciencia política, les primeres lluches obreres, l'autoorganización, la emigración, la Revolución d'Ochobre, la guerra contra'l fascismu, la represión, l'exiliu, los fugaos, la fuelgona del 62, el paternalismu franquista, la transición, la reconversión industrial, les movilizaciones del naval, la llucha de les muyeres d'IKE o'l papel de los sindicatos hasta les movilizaciones actuales.
