UVIÉU, 21 Ene. (EUROPA PRESS) -
L'investigador Inaciu Galán mostró esti martes el so malestar pol fechu de nun poder presentar na Universidá d'Uviéu la so tesis 'La llingua asturiana nel franquismu' n'asturianu. "Facer y defender una tesis n'asturianu sigue siendo güei un fechu ensin normalizar y que xenera dificultaes a un investigador", llamentó.
Según esplicó, en presentando la so tesis dafechu n'asturianu, la Comisión de Doctoráu de la Facultá de Filosofía y Lletres devolvió-yla encamentándolu a incluyir conclusiones tamién en castellanu.
Según Galán, realizóse una interpretación del reglamentu de doctoráu "abusiva y que provoca un tratu al asturianu de forma discriminatoria, obligando a les persones que faen una tesis n'asturianu a pidir permisu y a incluyir partes de la mesma en castellanu".
Finalmente Galán esplicó que tuvo qu'incluyir "por imperativu llegal" el testu en castellanu acompañando al orixinal asturianu.
"Ye llamentable que cada pasu que queremos dar pa vivir con normalidá n'asturianu sía un problema pa les persones que queremos usar esti idioma. Nun pidimos más que poder vivir colos mesmos derechos que les persones que quieren espresase en castellanu", esplicó Galán esta mañana.
