Publicado 02/10/2020 11:17CET

Educación entama mañana'l primer exame oficial de llingua asturiana, al que s'apuntaron 800 persones

Testos normativos de llingua asturiana.
EUROPA PRESS. - Archivo

UVIÉU, 2 Oct. (EUROPA PRESS) -

La Conseyería d'Educación entama a partir de mañana, sábadu, 3 d'ochobre, la primer prueba de certificación de Llingua Asturiana de nivel entemediu (B2). A estes pruebes apuntáronse 800 persones, anque había un cupu máximu de 500 places.

El primer día van celebrase los exámenes escritos, nel edificiu sur de la Facultá de Formación del Profesoráu y d'Educación. El llunes, 5 d'ochobre, van empezar los orales, nel Institutu Aramo, d'Uviéu.

La convocatoria tien el so propiu protocolu de midíes hixénico-sanitaries visáu pola Conseyería de Salú. Pa cumplir con tolos requisitos de seguridá, la entrada va ser gradual. A cada participante unviaron un mensaxe SMS asignándo-y una hora d'accesu.

Un total de 800 aspirantes rexistraron la so solicitú pa participar nesta prueba de certificación, pa la que s'estableció un cupu máximu de 500 places. El criteriu de selección pa determinar quién podría realizar na prueba foi al traviés de sortéu de la lletra del apellíu. P'acabar, formalizaron el pagu del preciu públicu correspondiente 407 candidatos y candidates.

Per otru llau, esta selmana constituyéronse dos tribunales nomaos pola Conseyería d'Educación, que van ser los encargaos de xestionar los exámenes de certificación. Dambos tán integraos por profesoráu funcionariu de carrera del cuerpu de profesores de Secundaria y por llingüistes espertos en Llingua Asturiana.

Les pruebes surden de la collaboración ente les conseyeríes d'Educación y Cultura, Política Llingüística y Turismu. El decretu 47/2019, de 21 de xunu, pol que s'establecen los niveles de competencia del usu de la Llingua Asturiana y que regula esta prueba de certificación foi diseñáu por Cultura, Política Llingüística y Turismu.

Educación encargóse de la convocatoria, la inscripción, la organización y l'aplicación de los exames. Va ser tamién l'Alministración encargada de los certificaos. Los niveles tán afechos al Marcu Común de Referencia Européu (MCRE) de les Llingües.

Asturianu ofrecido por