UVIÉU, 22 Oct. (EUROPA PRESS) -
La Fiscalía del Principáu d'Asturies alcordó, nes dilixencies preprocesales incoaes el mes de mayu depués de los accidentes, ún d'ellos mortal, na Sienda del Osu, treslladar a los conceyos de Proaza, Santu Adrianu, Quirós y Teberga, y al Principáu d'Asturies, del estudiu realizáu sobre la mesma y del informe ellaboráu pola Guardia Civil, que detectó hasta 201 defectos en distintos tramos de la ruta.
Según informa la Fiscalía, l'apertura de les dilixencies nun obedeció namás a la investigación d'un fechu delictivu, sinón al llogru d'información abondo pa la realización d'un estudiu sobre l'estáu de caltenimientu y señalización de la Sienda y, polo xeneral, sobre les midíes de seguridá adoptaes na ruta. Too eso pa valorar la suficiencia de les mesmes y, nel so casu, encamentar a l'adopción d'otres nueves.
Por eso, pa determinar la titularidá y competencies sobre la Sienda, atropóse la información del BOPA y, nel ámbitu xurisdiccional, llográronse dos pronunciamientos de la Sala de lo Contencioso-Alministrativo del Tribunal Superior de Xusticia d'Asturies rellacionaos con accidentes previos nesi llugar.
Depués, pa comprobar l'estáu de caltenimientu y señalización de la ruta, oficióse a la Guardia Civil -Seprona- pa qu'ellaborara un informe.
P'acabar, pa conocer los elementos y midíes de seguridá con que cuntaba la Sienda, amás de les actuaciones de caltenimientu realizaes, oficióse a la Conseyería d'Infraestructures del Principáu d'Asturies y a los Conceyos de Santu Adrianu, Quirós, Teberga y Proaza.
Nes sos conclusiones, les dilixencies de la Fiscalía, amás del treslláu del informe de la Guardia Civil pa la subsanación de los defectos de seguridá y caltenimientu, determinen que la xestión de la Sienda tradicionalmente efectuóse sobre la base de subvenciones solicitaes pola Mancomunidá pa ordenar, caltener y acondicionar la Sienda y, sobre esa base, los tribunales determinaron que la responsabilidá por accidentes yera de la Mancomunidá --qu'a día de güei, ta n'estáu de lliquidación, coles consecuencies qu'ello pudiera tener de cara a cada conceyu--
En 2004 firmóse un importante conveniu temporal ente'l Principáu y la Mancomunidá pa la collaboración en diverses actuaciones de recuperación de la Sienda del Osu, que prevía derechos y obligaciones pa les partes (financiación y caltenimientu).
Con posterioridá, nun existen malapenes preseos de xestión compartida y programada sobre la ruta, sacantes los Planes d'Empléu Local -de los que faen usu los Conceyos- y la collaboración económica del Principáu pa la igua de daños. La Sienda ye un espaciu natural pel que pasen muches persones, lo que gasta los sos elementos pol mugor y la climatoloxía, igües non siempres menores, y qu'axunta a cuatro conceyos, polo que demandaría dalguna fórmula estable d'evaluación, xestión programada y collaboración ente les alministraciones autonómica y local.
