UVIÉU, 11 Oct. (EUROPA PRESS) -
El portavoz del Grupu Parllamentariu de Foru na Xunta Xeneral del Principáu, Adrián Pumares, anunció esti vienres que la so formación rexistró una Proposición Non de Llei (PNL) pa impulsar una "discriminación fiscal positiva" na zona rural asturiana.
En rueda de prensa, Pumares esplicó que l'oxetivu ye favorecer la fixación de población y actividá económica na zona rural polo que dende Foru esperen cuntar col apoyu del restu de grupos parllamentarios.
Igualmente, apuntó la necesidá d'ellaborar un censu de conceyos pa ver en cuántos de los 78 conceyos asturianos hai qu'implantar midíes, teniendo en cuenta les característiques socioeconómiques y l'incidencia del éxodu de población. "Nun tendría que tener problemes pa salir alantre na Xunta Xeneral", dixo sobre la so iniciativa.
En concreto, Foru plantea "encamentar al Conseyu de Gobiernu a impulsar urxentemente l'aprobación y execución de midíes de calter normativu, fiscal y presupuestariu que permitan detener y correxir el cayente demográficu que se ta produciendo n'amplies zones rurales del Principáu, al traviés d'un Programa d'Acciones de Discriminación Positiva".
Asina, propón "deducciones en tolos gastos de vivienda, tanto de compra o rehabilitación", d'un 5% hasta 9.000 euros de base tanto en vivienda habitual como en segunda vivienda, amás d'ayudes al arriendu, en gastos derivaos de la educación y curiáu de los fíos, y tamién nos gastos de desplazamientu.
Pumares tamién considera "necesario que les Cortes Xenerales modifiquen l'Impuestu sobre Sociedaes pa establecer bonificaciones na cuota del Impuestu pa les pymes que desenvuelvan la so actividá empresarial na zona rural".
