UVIÉU, 18 Nov. (EUROPA PRESS) -
L'escritor Francisco Álvarez (Xixón, 1970) ye'l ganador de la tercera edición del Premiu de Relatos Curtios 'Xosé Caveda y Nava', convocáu pol Conceyu de Villaviciosa col rellatu 'El faru de Viena'.
El xuráu, formáu pola escritora y secretaria de l'Academia de la Llingua Marta Mori, la crítica lliteraria Marta López Fernández y el profesor y presidente de la asociación Cubera Ángel Valle, actuando como secretariu Pablo Suárez Fernández, del Serviciu de Normalización Llingüística de la Comarca de la Sidra, decidió por unanimidá conceder el premiu al relatu tituláu 'El faru de Viena'.
El xuráu destacó'l valir d'una historia "bien narrada", aposentada en fechos históricos de relevancia "y col interés necesario como pa mantener una llectura atenta y emocionada".
Álvarez ye escritor, periodista y traductor y tien ganáu'l premiu Xosefa Xovellanos de novela na so edición de 2015 con 'Lluvia d'agostu', que constituyó amás tou un éxitu editorial, tien ganaos dellos concursos de rellatos como'l Concursu de Cuentos pola Oficialidá del Asturianu de Bimenes y publicaes obres como 'Patiu de prisión', 'En poques pallabres' y 'Dixebra. Cróniques d'un pueblu'. Na última d'elles, 'Pasaxeros de la nueche' (Hoja de Lata, 2019), axunta la só última produción de narrativa curtia.
El premiu, dotáu con 1.000 euros, ta prevista pal día 21 de febreru, coincidiendo col día internacional de la llingua materna.
