Actualizado 11/05/2011 15:19

La Fundación Caveda y Nava pide a los ocho principales partíos un consensu sobre la llingua como en Galicia

UVIÉU, 11 de Mayu (EUROPA PRESS)

El presidente de la Fundación Caveda y Nava, el profesor y filólogu Ramón d'Andrés realizó esti miércoles un llamáu a los principales partíos políticos, que se presenten a les elecciones autonómiques la inclusión na so axenda electoral del debate sobre la oficialidá del asturianu, y busca d'un consensu nesti tema asemeyáu al algamáu en Galicia.

D'Andrés refirióse a esti asuntu mientres una rueda prensa, tres la celebración d'una xunta con representantes de la coalición Bloque por Asturies-Unidá Nacionalista Asturiana. Xunto col presidente, compareció per parte de la fundación el patronu y escritor, Xuan Bello, y per parte de les dos formaciones, tuvieron presentes el so candidatu autonómicu, Rafael Palacios, y la so vocera, Yolanda Huergo.

D'Andrés mostró la so preocupación porque "el debate de la 'llingua' decayó, baxó d'intensidá", y por tanto mostró'l so interés en recuperalu nel alderique electoral. Asina, informó que la Fundación envió cartes a los candidatos de los ocho principales partíos qu'acuden a les próximes elecciones autonómiques n'Asturies: Javier Fernández (PSOE), Isabel Pérez-Espinosa (PP), Jesús Iglesias (IU-Verdes), Francisco Álvarez Cascos (Foru Asturies), Rafael Palacios (BA-UNA), Juan Morales (Ideas), Ignacio Prendes (UPyD) y Xuan Xosé Sánchez Vicente (URAS-PAS).

A toos ellos, la Fundación espresó la so voluntá de "tender pontes pal diálogu", con cuenta d'algamar "unos mínimos positivos", esplicó d'Andrés. El presidente del colectivu señaló trés idees básiques: que la llingua asturiana cuerre peligru de desapaición, que ye una llingua d'España y que precisa de midíes eficaces.

Tanto d'Andrés como Palacios incidieron en que l'asturianu "nun ye patrimoniu de nengún partíu, sinón de tolos asturianos". Por esti motivu, el presidente de la Fundación espresó'l so deséu de que s'algame esi consensu, "como pasó en Galicia, onde toos tienen claro que'l gallegu ye una llingua y hai que tirar por ella, y dempués caún tien los sos matices". "Esi consensu tovía nun s'algamó n'Asturies", añadió.

Preguntáu pola posibilidá d'algamar esi "mínimu consensu", con partíos tan distantes como Bloque-UNA o UPyD, Xuan Bello mostróse optimista.

Pela so parte, Palacios espresó'l compromisu de BA-UNA de caltener el tema del asturianu nel debate políticu y de buscar esi consensu en favor de la oficialidá de la llingua.

Asturianu ofrecido por