Publicado 20/02/2020 11:50CET

García Granda aboga por un consensu sobre La Llaboral al traviés d'una candidatura "bien formulada y que fale de too"

Santiago García Granda.
EUROPA PRESS.

El rector afirma que dende la Universidá van apoyar cualquier midida destinada a rehabilitar la figura del rector Alas

UVIÉU, 20 Feb. (EUROPA PRESS) -

El rector de la Universidá d'Uviéu, Santiago García Granda, abogó esti xueves por una propuesta de consensu ensin entrar en "polémiques" sobre la candidatura a Patrimoniu de la Humanidá del edificiu de La Llaboral, anque tamién apostó por que tea "bien formulada" y "fale de too".

Granda mostró l'apoyu la institución que preside a la propuesta de que "l'edificiu civil más grande d'España", recordó, sía patrimoniu mundial de la Unesco al ser "un emblema d'Asturies". "Nós vamos tar siempre cola valorización de lo qu'existe n'Asturies", indicó Granda.

Nesi sentíu, defendió que lo importante ye l'usu que tenga'l complexu de La Llaboral y "que s'utilice racionalmente y tenga unos usos lo más intensos posibles", polo qu'abogó por una propuesta de consensu "ensin entrar nuna polémica sobre si los oríxenes son duldosos o non".

"Queremos un consensu, que se reconozan esos oríxenes y que vaigamos tola sociedá asturiana a apoyar esa visión y usu nuevu del edificiu", indicó, p'añadir que dende la Universidá van apoyar la candidatura, "pero que tea bien formulada y que fale de too", sentenció.

REHABILITACIÓN DEL RECTOR ALAS

Les declaraciones del rector foron minutos enantes del actu Rector Alas de toma de posesión de cargos académicos y de catedrátiques y catedráticos y profesoráu titular. Actu que val d'homenaxe al ex rector Leopoldo García-Alas, que mató'l 20 de febreru d'hai 83 años el fascismu.

Preguntáu polos medios sobre la rehabilitación alministrativa del ex rector, Granda señaló que ye una cuestión que nin la familia llegó a plantea-y. Amás, afirmó desconocer si ye una cuestión n'aplicación de la llexislación actual sobre memoria histórica, pero esclarió que sería una iniciativa qu'apoyaríen dende la Universidá d'Uviéu.

Asturianu ofrecido por