UVIÉU, 16 Nov. (EUROPA PRESS) -
'Garráime, que lu mato o la lloca hestoria d'Asturies', d'Escenapache, va poder vese esti vienres 16 de payares a les 20.00 hores nel uviedín Teatru Filarmónica, dientro del II Festival de Teatru Nel Amaro, que pretende consolidar y prestixar el teatru modernu n'asturianu y que tien entrada llibre y gratuita.
Trátase d'un certame con cuatro obres finalistes --de les nueve propuestes que se presentaron al premiu--, del que va salir el ganador del II Premiu de Teatru Nel Amaro, qu'entrega'l Gobiernu asturianu. La compañía escoyida va recibir un premiu de 6.000 euros y un circuitu de bolos pa representar la obra.
L'espectáculu d'esti vienres ye la tercera sesión del festival y, en clave d'humor irónicu, desarrolla en distintes escenes y cuadros, pertenecientes, cáun d'ellos, a una dómina en concreto.
Principia na prehistoria, col homo prexubilatus, antecedente remotu de los asturianos. Trátase ente otros la invasión de los godos, la batalla de Cuadonga, la monarquía asturiana, la figura de Carlos V y la de Xovellanos o la Revolución del 34.
La escena final ye futurista y afáyase nuna escursión de xubilaos al centru Niemeyer nel añu 2061, qu'inclúi l'aparición de la mesma Santina.
