Actualizado 11/05/2012 12:45 CET

El Gobiernu asturianu presentará la próxima selmana'l mapa de la toponimia d'Asturies

UVIÉU, 11 de Mayu (EUROPA PRESS)

El director xeneral de Política Llingüística, Alfredo Álvarez Menéndez, va presentar la próxima selmana'l Nomenclátor Xeográficu de la Toponimia Oficial d'Asturies', un instrumentu creáu en collaboración col Centru de Cartografía dependiente de la Dirección Xeneral d'Ordenación del Territoriu y Urbanismu, col doble propósitu de facer posible, de primeres, la encuestación y cartografiáu de la toponimia asturiana y, de segundes, l'accesu fácil y rápido de tolos usuarios a los nomes oficiales de les entidaes de población d'Asturies.

Según informó nuna nota prensa la Conseyería de Cultura, Alfredo Álvarez informó sobre les novedaes del Nomenclátor a la Xunta Asesora de Toponimia (XAT) Asturiana en dos reuniones nes que tamién se debatió la solicitú llegada dende'l Conceyu de Carreño de revisión de los nomes de Quimarán, El Pieloru y El Riistru establecíos como formes oficiales pol Decretu 30/2005, de 21 d'abril. Finalmente acordóse treslladar al mentáu conceyu les siguientes propuestes: Quimarán/Quimarán, El Pieloro/El Pieloro, El Riestru, al entender que toes elles son formes tradicionales y vives ente los vecinos d'estes poblaciones.

Coles mesmes, la Xunta de Toponimia respondió positivamente a la solicitú del Conceyu d'Illas de revisión d'algunos de los topónimos qu'apaecen nel segundu dictame ellaboráu pola XAT. D'esta manera, y acordies coles previsiones de la mesma Conseyería, los 144 topónimos tradicionales d'esti conceyu van poder oficializase en feches próximes pol Conseyu de Gobiernu, sumándose a los cuarenta y nueve conceyos que nestos momentos yá establecieron les formes oficiales de la so toponimia tradicional.

De la mesma, ellaboróse'l primer dictame de los conceyos de Peñamellera Alta y Cabrales. En breve, van enviase pal so estudiu y, nel so casu, aprobación polos respectivos plenos municipales de los sos Conceyos. Con estes actuaciones, el Gobiernu asturianu sigue'l procesu pa completar la revisión de la toponimia de los 78 conceyos d'Asturies. Col d'Illas van ser yá 50 los conceyos que cuenten con Decretu de Oficialización y 15.234 los topónimos tradicionales qu'alquirieren l'estatus oficial.

La revisión y recuperación de la toponimia tradicional d'Asturies ye un llargu y refechu procesu entamáu yá nel 2002 -cola publicación del Decretu 98/2002, de 18 de xunetu, pol que s'establez el procedimientu de recuperación- en cumplimientu de establecer na Llei 1/98 de 23 de marzu d'usu y promoción del Bable Asturianu.

Trátase d'un complexu y rigorosu trabayu nel que, xunto colos investigadores, encuestadores y espertos en toponimia designaos pola Conseyería de Cultura y Deporte, intervienen los partíos políticos con representación municipal, los colectivos y asociaciones vecinales, l'Academia de la Llingua Asturiana, el Ridea y l'Universidá d'Uviéu. La XAT tien encamentáu un oxetivu claramente definíu nel mandatu llegal de la Llei d'usu y promoción: establecer -y, nel so casu, revisar- na so forma tradicional la denominación oficial tantu de los nomes de población yá rexistraos como -y non menos importante- la de munchos otros nomes, de tradición fundamentalmente oral, qu'hasta la fecha nun figuraben en catálogu o rexistru oficial algún y que, sin duda, son parte fundamental del patrimoniu cultural inmaterial d'Asturies.

Asturianu ofrecido por