Actualizado 04/03/2009 14:49 CET

Gotor afirma que'l Principáu y el Rectoráu recomendaron a Maxisteriu la creación d'una mención d'asturianu

UVIÉU, 04 de Marzu (EUROPA PRESS)

El rector de la Universidá d'Uviéu, Vicente Gotor, aseguró güei ante los medios que tanto'l Principáu como'l Rectoráu recomendaron a la directora de la Escuela de Maxisteriu, Gloria López Téllez, la creación d'una mención d'asturianu de 30 creitos.

Al acabar una rueda de prensa p'anunciar la firma d'un conveniu, Gotor respondió a entrugues de los periodistes sobre'l 'Plan Bolonia' y sobre la reforma de los estudios de la Escuela de Maxisteriu, na que los sectores favorables a la enseñanza universitaria del asturianu piden que tea presente la llingua.

"La directora sabe que tien una recomendación tanto per parte del Principáu como del equipu de gobiernu, de tener una mención de 30 creitos d'asturianu", señaló Gotor. Añadió que nel 'máster' de secundaria tamién va haber asturianu pa que los profesores que tean nél seyan los que dean les clases nes escueles.

Pal rector, les manifestaciones en favor de la llingua en maxisteriu son "debíes tamién a la falta d'información". "Na Facultá de Filoloxía hai estudios reglaos la primer vez; en diez años nunca se ficiere nada pola llingua", espunxo.

BOLONIA

El rector afirmó tamién que les manifestaciones de los estudiantes contra'l 'Plan Bolonia' se deben a la desinformación de los mesmos y almitió la so parte de culpa nesta falta d'información.

"El Ministeriu y les propies universidaes tuvimos parte de culpa nesa desinformación, dao que'l Plan Bolonia nun ye negativu pa los alumnos", argumentó Vicente Gotor. "Siempre que se mos pidió información s'ofreció", añadió.

"El plan tien abondes ventayes con mayor movilidá pal estudiante", espresó Gotor y añadió que nun ye correcto que se vaya privatizar la Universidá, dao que la ministra anunció l'aumentu económicu pa beques.

Asturianu ofrecido por