UVIÉU, 13 Nov. (EUROPA PRESS) -
El procesu de les primaries de Podemos Asturies yá tien dos candidatures conformaes. Una ta encabezada pola diputada Lorena Gil, mentes que la otra ta liderada pol filólogu Héctor Gómez.
A pesar de que dambes partes confirmaron que la candidatura yá foi rexistrada y que Podemos anunciara la publicación de les llistes pa esti llunes 12 de payares según el so calendariu oficial, esti martes entá nun podíen consultase les llistes na páxina web de les primaries de la formación morada.
El mesmu domingu 11 de payares, el responsable de Municipalismu de Podemos n'Asturies, Rogelio Crespo, mostróse convencíu de que se diba a presentar una candidatura unitaria qu'axuntara a toles sensibilidaes. Nun foi asina y finalmente, existen polo menos dos candidatures rexistraes.
La de Lorena Gil cuenta con secretariu xeneral de Podemos, Daniel Ripa, la conceyala xixonesa Nuria Rodríguez y los diputaos rexonales Paula Valero (númberu 1 por oriente) y Andrés Fernández Vilanova (númberu 1 por occidente) y el que foi líder del Bloque por Asturies Rafael Palacios. Abren tamién la posibilidá a la entrada d'independientes nos primeros puestos, según esplicaron a Europa Press.
La otra candidatura, encabezada por Héctor Gómez cuanta con Begoña Díaz (númberu 1 por oriente), Anaya Caraduje, Cristina Tuero y Mónica Uría (númberu 1 por occidente).
Lorena Gil ye llicenciada en Filoloxía Inglesa pola Universidá d'Uviéu. Llicenciada en Ciencies Polítiques pola UNED y Beca de Internacionalización Empresarial del Institutu Español de Comerciu Esterior (ICEX). Trabayó na Oficina Económica y Comercial d'España en Düsseldorf (Alemaña), nos Servicios Centrales de ICEX en Madrid y cuenta con una esperiencia de trece años nel sector industrial n'Asturies, los últimos diez nuna empresa multinacional como profesional de Recursos Humanos, según la información qu'aparez nel so perfil na páxina de Podemos. Trabayó al empar en xestión cultural. Ye diputada rexonal dende 2015.
Héctor Gómez, per otru llau, ye natural de Xixón y ye doctor en Filoloxía. Defínese como "profesor precariu y emprendedor forzosu" y afirma que probó "en carne propio la falta d'oportunidaes" que sufren los asturianos.
Según el calendariu de Podemos, del 13 al 19 de payares celébrase la campaña electoral con debates presenciales. El pieslle del censu yá se produció, el día 10 de payares pasáu y les votaciones van ser del 20 al 25 de payares. La proclamación de resultaos va ser el 27 de payares.
