UVIÉU, 14 Feb. (EUROPA PRESS) -
El mercáu y la industria de la llingua supón n'Asturies en 5% del valor añadíu brutu (VAB) y el 7,3% del empléu. En términos comparativos, el pesu económicu ye asemeyáu a la producción d'enerxía o a la construcción.
Asina se recueye nel 'Estudiu sobre'l marcu afayadizu pa la planificación y desarrollu de la normalización del usu de la llingua asturiana y el gallego-asturianu nel ámbitu del Principáu d'Asturies', coordináu pol profesor de la Universidá d'Uviéu Miguel Presno y al que tuvo accesu Europa Press.
Les actividaes económiques rellacionaes coles llingües propies d'Asturies --asturianu y gallego-asturianu-- tienen una dimensión económica, porque una parte importante de la población consume productos culturales o recibió educación formal neses llingües, según se recueye nel informe.
L'estudiu dirixíu pol catedráticu Miguel Presno esplica que n'España se midió'l pesu d'esti tipu d'actividaes na economía y sumen un 10% del PIB. Otres llingües del Estáu tamién midieron el so pesu nes economíes de les Comunidaes Autónomes onde son cooficiales. Asina, el vascu apurre'l 4,2% del PIB rexonal y el 6,3% del empléu del País Vascu y el valencianu'l 2,1% del PIB y el 2,9% de la ocupación de la Comunidá Valenciana.
"La dimensión de la investigación d'esti informe nun permite'l llogru de datos primarios sobre'l pesu de caúna de les llingües del Principáu na economía, pero foi posible calcular la dimensión del conxuntu, esto ye, de toles llingües al empar. Esti aproximamientu va permitir calcular depués en qué grau se potenciaría'l sector de la llingua con un cambiu nel estatus llegal del asturianu y del gallego-asturianu", indiquen nel estudiu.
Los cálculos fixéronse adaptando la metodoloxía de los estudios que midieron el pesu del español, del vascu y del valencianu nes sos economíes a partir de la operación contable conocida como Marcu Input-Output d'Asturies, qu'ellabora la Sociedá Asturiana d'Estudios Económicos y Industriales. Los resultaos indiquen que la llingua n'Asturies supón el 5% del valor añadíu brutu y el 7,3% del empléu.
Trátase d'una partede la economía con valor añadíu altu y intensiva n'empléu. Na distribución interior pue vese un pesu importante de la educación, tanto en términos de producción como n'empléu. Depués, tán les actividaes de la cultura, especialmente la edición y les actividaes cinematográfiques de radio y televisión siguíes de les actividaes de publicidá. En términos comparativos, el pesu económicu ye asemeyáu a la producción d'enerxía o a la construcción.
