Iniciativa enfea a RTVE una visión "monollingüe" de la realidá llingüística española nun documental sobre'l castellán

INICIATIVA POL ASTURIANU

   UVIÉU, 9 Jun. (EUROPA PRESS) -

   Iniciativa pol Asturianu espresó esti martes el so "fondu malestar pol tratamientu del asturianu y de la diversidá llingüística" nel programa documental 'La gran aventura de la lengua española', emitíu por La 2 y presentáu por Iñaki Gabilondo. Poro unvió una carta a José Pablo López Sánchez, presidente de RTVE.

   La organización de reivindicación llingüística considera que l'espaciu aporta una visión "incompleta, monollingüe y parcial" de la realidá llingüística del Estáu español al centrar el so rellatu esclusivamente na historia y evolución del castellán, dexando nunn papel marxinal y secundariu al restu de les llingües propies d'España.

   Nel so escritu, la presidenta d'Iniciativa pol Asturianu, Arantza Margolles, señala que resulta "incomprensible producir un programa sobre la historia de les llingües y faer referencia namás al castellán*", sobremanera al tratase d'una corporación pública que, a xuiciu de la entidá, tien de garantizar conteníos plurales, rigorosos y respetuosos cola diversidá cultural y llingüística d'España.

   La entidá critica que'l programa recurra a omisiones y referencies secundaries respecto a les otres llingües peninsulares, tresmitiendo a la audiencia una imaxe que nun reflexa la realidá d'un Estáu nel que un 45 % de la población utiliza llingües distintes del castellán.

   Amás, Iniciativa pol Asturianu cuestiona l'enfoque académicu del programa al considerar que da cabida a interpretaciones llingüístiques venceyaes a corrientes tradicionales y centralistes ensin incorporar el contraste necesariu coles aportaciones de la llingüística contemporánea.

   Por too ello, Iniciativa pol Asturianu solicita a RTVE que revise los criterios utilizaos na ellaboración d'esti tipu de conteníos y refuerce'l so compromisu col rigor científicu, la pluralidá d'enfoques y el respetu a la diversidá llingüística y cultural esistente n'España.