UVIÉU, 7 Nov. (EUROPA PRESS) -
El presidente d'Iniciativa pol Asturianu, Inaciu Galán, pidió que l'asturianu tea presente na negociación presupuestaria "pa que recupere tarrén depués d'una década de recortes".
Al traviés de nota de prensa, l'asociación señaló qu'esti momentu ye l'afayadizu "pa trabayar na normalización del asturianu dientro de l'alministración asturiana, agora que'l consensu n'avanzar na normalización ye más grande que nunca".
Nesi sentíu, señalen qu'ún de los puntos clave nesti camín ye'l de los medios públicos, polo que proponen que se meyore esta presencia cola creación d'un serviciu de normalización dientro de RTPA. "L'ente tien qu'asumir el papel normalizador del asturianu y pa ello ha tener y han d'apurrise los recursos necesarios pa ello", indica Galán.
Iniciativa va facer llegar estes propuestes a los grupos parllamentarios de la Xunta Xeneral y señalen que "ye importante que se trabaye en polítiques de normalización llingüística tresversal" y que toles conseyeríes dediquen recursos "y sobre manera voluntá". "Nun ye una cuestión namás de la Conseyería d'Educación y Cultura, sinón de tolos ámbitos de xestión", afirmen.
Por eso, dende Iniciativa proponen crear llínies de trabayu en toles conseyeríes y piden a los partíos que tán nestos momentos negociando los presupuestos y que tienen en marcha la reforma estatutaria pa incluyir la oficialidá "que faigan un esfuerciu pa consiguir avances presupuestarios que permitan siguir avanzando nesi sentíu, construyendo una presencia mayor del idioma en tolos ámbitos".
