UVIÉU, 8 Oct. (EUROPA PRESS) -
L'artículu 'Nes llendes l'aldea: Paisaxe y territoriu en Vigaña (Miranda)', del equipu de la profesora de la Universidá d'Uviéu Margarita Fernández Mier, ta ente les cinco publicaciones del CSIC más lleíes na plataforma Researchgate, una de les webs académiques más importes d'ente toles usaes polos profesores universitarios.
Asina, esta selmana, nel top 5 de publicaciones del CSIC en Researchagate entra una investigación escrita n'asturianu. Les otres cuatro más lleíes tán escrites n'inglés y tienen más que ver coles ciencies naturales. "Esto demuestra que, si'l tema ye d'interés, la llingua asturiana nun ye torga pa lleer estes publicaciones", afirmó Mier en declaraciones a Europa Press.
'Nes llendes l'aldea: Paisaxe y territoriu en Vigaña (Miranda)' ye una investigación coordinada pola doctora d'Historia y profesora del departamentu d'Historia de la Universidá d'Uviéu Margarita Fernández Mier. Nesti artículu tamién participaron David González Álvarez, César Martínez Gallardo, Pablo López Gómez y Candela Martínez Barrio.
La obra ta publicada dientro del octavu volume de la colección 'Excavaciones arqueológicas en Asturias', editada pol Gobiernu asturianu y que recueye los principales trabayos arqueolóxicos que s'entamaron nel Principado nos últimos años.
