Actualizado 08/02/2016 16:02

IU propón que se convoque a los diputaos de la Xunta n'asturianu y el PP opónse

UVIÉU, 8 de Febreru (EUROPA PRESS)

La diputada d'IU na Xunta Xeneral del Principáu d'Asturies Concepción Masa propunxo esti llunes que puea convocase n'asturianu a los diputaos pa la Comisión especial d'estudiu sobre'l réxime de protección y promoción del Asturianu y les sos distintes alternatives. El PP opúnxose frontalmente.

Anque'l voceru d'IU nel parlamentu asturianu, Gaspar Llamazares, nun se refirió al asuntu na so comparecencia selmanal ante los periodistes tres la xunta de los representantes de los grupos, foi la so homóloga del PP, Mercedes Fernández, la que reveló que falara del tema y qu'ellos taben en contra dafechu.

"Nós queremos que les convocatories oficiales que fai la Xunta Xeneral se realicen na llingua oficial del Principáu d'Asturies, que nun ye otra que'l castellán; ye de sen común", insistió la dirixente del PP.

Barrunta Mercedes Fernández qu'IU tea intentando llograr "pela puerta d'atrás" qu'otru tipu de notificaciones del parlamentu asturianu se faigan n'asturianu. Por eso, consideró la iniciativa d'IU "un atayu indebíu" que nun respeta a los diputaos que nun comparten "les prioridaes que tienen los comunistes n'Asturies al respective de la oficialidá del bable". Fernández dixo qu'ella siempre va respetar qu'haya diputaos que puean utilizar l'asturianu, porque ye'l so derechu, pero dexó claro que la propuesta d'IU afecta a les comunicaciones oficiales de la Xunta Xeneral.

Tres les declaraciones del PP, foi la mesma Concepción Masa, que preside la comisión especial d'estudiu sobre'l réxime de protección y promoción del Asturianu y les sos distintes alternatives, la que quiso esclariar la so propuesta, que va debatise a lo último na próxima xunta de Voceres.

Masa esplicó que'l so oxetivu ye que la comisión que trata precisamente del asturianu, pudiera enviar tamién convocatories n'asturianu al empar qu'en castellán. "Nun esperábamos qu'hubiera nenguna reacción en contra, porque hai una llei d'usu del asturianu aprobada precisamente por un gobiernu del PP", apuntó.

Preguntáu pol asuntu, el voceru del PSOE, Fernando Lastra, dixo que nun ve inconveniente dalgunu pa que se faigan les convocatories n'asturianu y castellán, al tratase d'una comisión de calter específicu sobre la llingua. En tou casu, dexó claro que nel so grupu parlamentariu nun tán a favor de la cooficialidá nin que la mesma s'esprese "nin por activa nin por pasiva".

El voceru de Podemos, Emilio León, dixo que los diputaos de la so formación qu'asina lo deseen faen un usu dafechu normalizáu del asturianu. "Nun vemos nengún problema, creo que les dificultaes que pasen los asturianos son d'otru tipu y a naide a estes altures tendría que preocupáu-y si nesti parlamentu se fala n'asturianu o non", apuntó.

CIUDADANOS

Nes sos crítiques a la propuesta, Mercedes Fernández (PP), mostró la so sorpresa pol "entusiasmu" col qu'acoyera Ciudadanos la iniciativa d'IU, que, según ella, nun mostró "nin oxeción nin resistencia". A xuiciu del PP, la posición de Ciudadanos n'Asturies ye distinta al "discursu nacional" que lleva'l líder de la formación, Albert Rivera, per toa España.

Preguntáu sobre l'asuntu, el voceru de Ciudadanos, Nicanor García, dixo que ye favorable a que s'envíen convocatories n'asturianu y en castellán pa una comisión específica que trata sobre la llingua asturiana.

Mientres, Cristina Coto (Foru) consideró que les convocatories de la Xunta Xeneral, como norma xeneral, han facese n'asturianu. Sicasí, dixo que podría almitise una convocatoria billingüe (asturianu y castellán) pa esa comisión específica. Pero siempre como "una escepción".

Asturianu ofrecido por