La XDLA defende la oficialidá pa evitar estes situaciones y Iniciativa pide al PP "non xudicializar" la cuestión llingüística
UVIÉU, 12 Feb. (EUROPA PRESS) -
El presidente de l'Academia de la Llingua Asturiana, Xosé Antón González Riaño, afirmó esti miércoles que la decisión d'anular la Ordenanza del usu de la llingua asturiana del Conceyu de Mieres dexa en "papel moyao" la Llei d'Usu de 1998. "Ye una prueba clara de qu'hai que tirar hacia la oficialidá", dixo.
En declaraciones a Europa Press, Riaño posicionóse sobre la decisión del Tribunal Superior de Xusticia d'Asturies (TSXA) d'anular la ordenanza aprobada pol Plenu de Mieres el 22 de marzu de 2018 y que nel so primer artículu establez que "la llingua asturiana ye, col castellanu, la llingua empleada pol Conceyu de Mieres, l'Alministración Local y les corporaciones públiques que d'ella dependen".
Esto llevó al grupu municipal del PP a recurrila y la Sala de lo Contencioso Alministrativo del Tribunal estableció qu'un Conceyu nun tien potestá pa regular l'usu d'una llingua non oficial como l'asturianu n'igualdá de condiciones col d'una oficial como'l castellanu.
Nesi sentíu, el presidente de l'ALLA afirmó que nun ye la primer vez que se produz la situación de que'l TSXA anule llexislación d'ámbitu municipal que tien que ver cola promoción de la llingua asturiana, lo qu'al so xuiciu muestra que col marcu actual "nun hai garantíes pal exerciciu de los derechos llingüísticos n'Asturies".
Asina, esplica que'l marcu qu'establez la Constitución pa les comunidades autónomes con llingua propia ye la oficialidá "y lo que tien que facer Asturies ye cumplir con esa previsión constitucional, como pasó nel restu de territorios". Coles mesmes, recordó qu'esta situación muestra que la Llei d'Usu ye "papel moyao".
"Nin los xueces la tienen en cuenta", afirmó Riaño, qu'esplica que la mesma llei establez la competencia de los conceyos pa desarrollar una política llingüística, "pero cuando lo faen, la xusticia diz que como nun ye oficial nun se pue facer".
Nesi sentíu, foi bien criticó col PP por posicionase en contra de la oficialidá alegando que la Llei d'Usu yá s'afaya a les necesidaes d'Asturies, "pero cada vez qu'hai un pasu alantre nel so desarrollu actúen a la escontra". "Ye una prueba clara de qu'esti marcu llegal nun val y qu'hai que tirar hacia la oficialidá", sentenció.
"INTOLERANCIA" DEL PP
Otra manera, el portavoz de la Xunta pola Defensa de la Llingua Asturiana (XDLA), Carlos Pulgar, esplicó que la decisión xudicial d'anular la ordenanza de Mieres demuestra "la insuficiencia del marcu llegal que protexe l'usu del asturianu y faen más urxente que nunca un estatus d'oficialidá qu'ampare los nuestros derechos ciudadanos".
Pa esta organización, la oficialidá ye la manera d'evitar "tar a mercé de la intolerancia prohibicionista de la que, desgraciadamente, fai gala'l PP cada vez que se da un avance mínimu de normalidá como son unes ordenances municipales".
Per otru llau, dende Iniciativa pol Asturianu, el so presidente Iván Llera llamentó la postura del PP "contra cualquier llexislación que permita l'usu del asturianu nos conceyos", como recordó que permite la Llei d'Usu. Amás, indicó que l'asturianu "nun pue ser un motivu pa xudicializar el funcionamientu d'un conceyu".
P'acabar, dixo que "nun se pue mantener dos postures sobre l'asturianu distintes al mesmu tiempu". Asina, acusó al PP de "colgase la medaya" d'aprobar la Llei d'Usu en 1998 pero "intentar valtar tolos avances que se dean amparaos dientro d'ella".
