MADRID, 11 Dic. (EUROPA PRESS) -
Depués del arrenunciu de Kevin Hart como anfitrión de la 91 ceremonia de los Premios Oscar por unos tuits homófobos que publicó hai años, l'Academia de les Artes y les Ciencies Cinematográfiques podría nun cuntar con nengún presentador pa la gala.
L'Academia ta considerando que la ceremonia, que se va celebrar el 24 de febreru, condúzanla un montón de famosos, dalgo al estilu Saturday Night Life, con "xente de moda", según señalaron fontes que prefieren caltener l'anonimatu a Variety. La xunta de directivos de l'Academia, que tamién ta considerando "un monólogu de grupu", va axuntase esti martes 11 d'avientu pa falar de les sos opciones y tomar una decisión.
Los dos ediciones pasaes, presentaes por Jimmy Kimmel, tuvieron datos bien baxos d'audiencia. Ello ye que la 90 edición foi siguida por 26.5 millones de persones, la cifra más baxa na historia de los premios Oscar. Y agora, depués del debate de Hart, la gala enfréntase a una pérdiga d'espectadores nueva.
Hart arrenunció a presentar la ceremonia'l xueves 6 d'avientu pasáu, un día depués de qu'anunciara la so participación. La decisión foi tomada depués de que salieren a la lluz unos tuits ofensivos contra la comunidá LGTB. "Decidí arrenunciar a presentar los Oscar anguaño", escribió'l comediante en Twitter depués de que se negara a esculpar polos sos chistes homófobos.
"Nun quiero ser una distracción nuna nueche na que se debería celebrar l'increíble talentu de tantos artistes", anunció l'actor de comedies como 'Escuela pa fracasaos' o 'Jumanji: Bienveníos a la xungla.' "Los mios más sinceres esculpes a la comunidá LGBT polos mios insensibles palabres nel pasáu", dixo finalmente.
