Publicado 03/01/2017 18:41

L'Anuariu de la Música analiza'l "les carencies" de la RPA y la "tercer revolución" del folk

Portada del Anariu de la Música Asturiana.
GOXE

UVIÉU, 3 de Xineru (EUROPA PRESS)

Goxe Producciones vien de publicar el nuevu Anuariu de la Música Asturiana, referente al añu 2016, nel qu'ente otros coses, analízase'l papel y "les carencies" de la Radio Principáu d'Asturies nel contestu musical asturianu, asina como la "tercer revolución" del folk, no que cinca a tendencies y estilos nuevos.

Nuna nota de prensa, la editora informa de la publicación d'esti nuevu númeru, que será presentáu el xueves qu'entra nel llocal La Llegra d'Uviéu. Como ye vezu les temátiques céntrense n'estilos como la música tradicional, el folk, el rock o la canción d'autor, con secciones qu'inclúin reportaxes, informes, entrevistes, crítiques, opinión, cróniques, recoyida de material o anuncies.

L'Entamu, nesta ocasión titúlase 'Una radio musicalmente asturiana' y nél fálase del papel que tien que xugar la radio pública nel contestu musical asturianu, con bien de carencies y dificultaes, concluyendo que *La música propia del país ha tener un tratamientu fondu, seriu, permanente y tresversal na so programación*.

En cuantes a los conteníos, destaquen los reportaxes titulaos *¿La tercer revolución del folk asturianu?* (sobre les tendencies y estilos nuevos que tán surdiendo nel panorama folk del país), *Política musical asturiana: análisis, revisión y propuestes* (onde protagonistes destacaos de la escena asturiana falen de too ello), o 'Música na maleta' (el llabor de los músicos asturianos emigraos); l'informe *La segunda xeneración moza* (sobre les voces más nueves de la tonada); les entrevistes a Vicente Díaz (qu'anuncia la so retirada de los escenarios), Rodrigo Cuevas (que fai repasu al añu en que se convirtió nun fenómenu de mases), Marisa Valle Roso (qu'adelanta cómo va ser el póximu discu) y al gaiteru Bras Rodrigo (que presenta'l so trabayu discográficu nuevu); o les cróniques sobre'l Premiu al Meyor Cantar o la participación asturiana nel Desfile de San Patriciu de Nueva York. Zárrase, como ye vezu, cola sección Collecha, onde apaecen les producciones del añu 2016, ventiséis en total (centraes fundamentalmente na tonada y la música pa neños), mui per debaxo de les d'hai unos años, según comenten los responsables del A.M.A.

El volume compleméntase con un discu onde se recueyen muestres de lo meyor qu'ufiertó'l 2016, con diecisiete cortes repartíos n'estilos como la tonada, el folk, el rock, les bandes de gaites o la canción d'autor, con artistes y grupos como L'Aldu, Señor Cabrales, Salón Bombé, Taranus, Rodrigo Cuevas, Pop Piquiñín, LaKadarma, Amieva o L-R. Ente los collaboradores d'esti númberu nuevu hai firmes como les de Damián Barreiro, Xicu Ariza, Xune Elipe, Ismael Arias, Ruma Barbero, Alberto Álvarez Peña, Inaciu Llope o Adolfo Camilo Díaz.

Dende Goxe Producciones, editora d'esti anuariu, quieren rescamplar l'esfuerciu que supón asoleyar una publicación como ésta, de calter gratuítu y financiada esclusivamente con publicidá, con diecisiete años de vida y una incidencia bultable nel panorama musical asturianu y n'asturianu.

Asturianu ofrecido por