Actualizado 19/09/2018 12:36 CET

L'Arqueolóxicu acueye una esposición sobre la historia de la llingua asturiana dientro de los Centenarios de Cuadonga

Presentación de 'Voces', esposición sobre la llingua asturiana.
EUROPA PRESS.

UVIÉU, 19 Sep. (EUROPA PRESS) -

El Muséu Arqueolóxicu d'Asturies acueye ente esti 26 de setiembre y el 14 d'ochobre próximu la esposición 'Voces, la llingua asturiana al traviés de los sieglos', que s'enmarca dientro de los actos de los Centenarios de Cuadonga.

La muestra presentóse esti miércoles n'Uviéu nuna rueda de prensa onde tuvieron presentes el director xeneral de Planificación Llingüística y Normalización del Gobiernu d'Asturies, Fernando Padilla; el coordinador de la muestra Xulio Viejo; y el director del Muséu, Ignacio Alonso.

Padilla esplicó que la esposición tien que ver colos 1.300 años del Reinu d'Asturies "porque nun se pue separtar la historia d'Asturies de la de la so llingua". Asina, la muestra supón una "visión histórica" del nuestru idioma inxertándolo na historia de la humanidá.

Per otru llau, Viejo afirmó que 'Voces' resume "décades d'investigación" sobre la llingua asturiana y muestra una visión global del idioma. "Nun tien un sentíu identitariu, sinón humanista y universal como parte del patrimoniu de tolos humanos", esplicó.

"L'asturianu ye la nuestra forma de participar nel ser humanos", dixo Viejo, que añadió que la esposición nun ye "una historia de bonos y malos, sinón la historia de la xente que fala esta llingua"

La muestra tien un valir didácticu y divulgativu al traviés de 25 paneles que van acompañaos d'otros materiales, como videos. Asina, va facese un percorríu dende la Prehistoria hasta la Transición, cola llegada de l'autonomía, anque mostrando l'actividá cultural n'asturianu de los últimos años.

Nesi sentíu, Viejo esplicó que dexaron de llau les últimes décades "pa evitar nomes propios y personalismos", amás del debate políticu sobre l'estatus xurídicu de la llingua. "Queremos permitir que l'espectador tome la so voz", indicó.

La esposición, amás de tar abierta pal públicu en xeneral, va tener cuatro visites guiaes pa centros educativos y otres dos pa públicu en xeneral. Amás, ta pensada pa ser itinerante y que los conceyos interesaos puedan solicitar acoyela.