Publicado 12/03/2018 15:56CET

Les señales nueves de la carretera de Camangu (Ribeseya) escaécense de la denominación oficial

Playa de Ribadesella
CAMILO ALONSO/AYUNTAMIENTO DE RIBADESELLA

IX va preguntar sobre l'asuntu al Gobiernu, al entender que se ta violando la normativa sobre la toponimia asturiana

UVIÉU, 12 Mar. (EUROPA PRESS) -

Les señales nueves que s'instalaron na carretera de Camangu, nel conceyu de Ribeseya, recueyen el nome antiguu (Camango), que yá nun ye l'oficial, según lo establecío nel decretu de 2010 pol que se determinaron los topónimos oficiales del conceyu de Ribeseya.

Hasta entós, el nome oficial yera Camango, pero a partir d'esa norma, tal como consta nel anexu del citáu decretu, el nome oficial ye Camangu.

De fechu, asina aparecía nes señales d'entrada y salida de la localidá na vía que va hacia Ribesella y Llanes. Sicasí, apocayá fíxose un cambiu de les señales y les nueves vuelven recoyer la denominación antigua, non la oficial.

L'episodiu, que nun pasó inalvertíu pa los vecinos, ye motivu d'esmolición pal grupu parllamentariu d'IX na Xunta Xeneral del Principáu d'Asturies, que decidió preguntar al Gobiernu d'Asturies pol asuntu.

"Ye un casu perclaru de violación de la normativa sobre toponimia asturiana", declaró a Europa Press la diputada rexonal d'IX Concha Masa, que rexistró una entruga al Gobiernu pa que sía respondida en sesión plenaria.

"¿Cuál ye la razón pola que'l Gobiernu d'Asturies nun ta respetando l'usu de los topónimos oficiales, y ta sustituyendo polos antiguos topónimos en castellanu, nos cambios de les señales de tráficu de víes de titularidá de la comunidá autónoma?", va preguntar la parllamentaria al Executivu rexonal. La entruga foi almitida a trámite esta selmana pola Mesa de la Cámara.