Actualizado 17/11/2009 18:51 CET

L'escritor Xulio Arbesú gana'l premiu d'ensayu n'asturianu 'Fuertes Acevedo' pol trabayu 'El destín treshumanu'

UVIÉU, 17 de Payares (EUROPA PRESS)

L'escritor Xulio Arbesú Rodríguez resultó ganador de la decimoquinta edición del Premiu d'ensayu en llingua asturiana 'Máximo Fuertes Acevedo', que concede la Conseyería de Cultura y Turismu del Principáu, según informó'l Gobiernu autonómicu al traviés d'una nota prensa, tres la decisión del xuráu, qu'emitió'l fallu esta mañana.

Ente les obres presentaes, el xuráu decidió conceder el premiu al testu tiuláu 'El destín treshumanu', al valorar que se trata d'un ensayu "de gran belleza llingüística y lliteraria que trata un tema orixinal dende una suxesitividá abierta". El trabayu analiza, en palabres del autor a Europa Press, "los cambios tecnolóxicos que s'aproximen nel futuru, y la so posible influencia sobre la propia naturaleza humana". Asina, señaló aspectos como los implantes o los avances na inxeniería xenética, que "puen ser positivos pero tamién conllevar peligros". Al so xuiciu, esti tipu d'adelantos tán en ciertu mou fuera de control.

El testu ganador presentólu baxo'l seudónimu 'Sócrates caleya'. Abierta la plica, l'autor resultó ser Xulio Arbesú Rodríguez.

Xulio Arbesú (L'Entregu, 1957) ye llicenciáu en Ciencies Empresariales. Diose a conocer nes lletres asturianes al algamar coles noveles 'Misión Pelaya' y 'Un raposu en Tresmonte', dos premios de narrativa de l'Academia de la Llingua Asturiana. Nel añu 2002 ganó'l Premiu 'Xosefa Xovellanos', que convoca la Conseyería de Cultura, con 'Potestas', una obra cola que s'interna nel sieglu XII, pa contar la historia del conde Gonzalo Pelaiz.

Arbesú repitió galardón (ex aequo con Adolfo Camilo Díaz) nel 2002 cola obra 'El pisu d'enriba', na que se mos narren les desgracies y aventures d'una madre moza que vive enriba d'un llocal de copes. Tien tamién publicada una colección de relatos cortos, 'Cuentos con neños', l'ensayu 'La informatización del transporte' y la obra teatral 'Les siete novies del Rei', qu'acaba d'apaecer nel sellu Suburbia Ediciones.

El xuráu que concedió esti galardón aconceyóse esti mediudía na sede de la Conseyería de Cultura y Turismu, baxó la presidencia de la Directora Xeneral de Política Llingüística, Consuelo Vega Díaz, y cola participación de los escritores y investigaciones, María Cueto, María Antonia Mateaos y Xurde Sierra. Otros cuatro ensayos optaben a esti premiu, dotáu con 7.000 euros.

Asturianu ofrecido por