L'ex guitarra de Los Berrones, Tante Blanco, presenta'l so nuevu proyectu musical en solitario esta nueche na RPA

Actualizado 18/03/2010 19:47:44 CET

UVIÉU, 18 de Marzu (EUROPA PRESS)

L'ex guitarra de Los Berrones, Tante Blanco, presentará esta nueche nel programa 'Rockmería', de la Radio del Principáu d'Asturies (RPA), el so nuevu proyectu musical, Stroza, una banda de rock, acabante de publicar el so primer discu, 'Música de Garrafón'.

El presentador del espaciu rafiofónicu, Xune Elipe, entrevistará al veteranu músicu de Tolivia nel so programa, qu'entamará a emitise de magar les 00.00 hores pela radio autonómica asturiana.

Tante Blanco dará a conocer el so nuevu trabayu 'Música de garrafón', que yá ta a la venta dende hai dos meses, compuestu por once temes, seis de los cuales son en castellán y cinco n'asturianu. Del estilu musical, esplicó que ruempe cola so etapa anterior en Los Berrones, por tar a mediu camín ente'l rock y el 'hard rock', frente al estilu "más suave, más pop, del so anterior conxuntu". Na grabación, que tuvo llugar na sala Eclipse d'Uviéu, participaron dellos conocíos nomes de la escena musical asturiana, como Chema Fombona (a la batería), Alejandro Blanco (baxu d'Ilegales) y Álvaro Bárcena (coru y guitarra acústica), siendo Tante la guitarra y voz.

Éstos son los intérpretes del primer discu, pero non necesariamente los miembros del grupu, pues la formación tovía nun ta definida. Blanco esplicó ayeri en declaraciones a Europa Press que la so intención ye formar una banda de rock, y los principales candidatos son estos trés músicos. Sicasí, reconoció que los actuales compromisos de caún d'ellos van ser torgues difíciles de salvar.

Sobre les lletres, trátense temes mui diversos, pero toos "modernos", como señaló l'autor. Destacó los títulos 'Brad Pitt', sobre los deseos insatisfechos de la xente, 'Atraco a los bancos', denuncia del actual sistema bancariu, o'l cantar que da nome al discu 'Música de garrafón', que critica'l tipu de soníu que se graba nes multinacionales discográfiques, "productos prefabricaos que faen que cada vez trunfe más l'autoproducción".

Sobre futuros conciertos tovía nun pudo adelantar nenguna fecha, pero sí anunció que ta pendiente de confirmar una actuación na FNAC.

DESPIDIDA DE LOS BERRONES

Blanco aprovechó pa matizar que nun surdió nengún problema ente él y la so anterior formación, Los Berrones, acabante de presentar el so últimu discu. "Dempués de 18 años taba un poco quemáu y llevaba tiempu queriendo romper sustancialmente. Entendí que cambiar la imaxe y l'estilu de Los Berrones yera matar al grupu, asina que decidí que lo meyor pa romper yera crear otra cosa diferente", esplicó.

Consideró también qu'un anunciu públicu oficial de la so salida del grupu diba perxudicar a los de Llaviana. "Llegó a dicise que se disolviere'l grupu, cuando ye mentira, siguen tocando pero sin Tante", esplicó. Por eso decidió "salir pela puerta d'atrás, sin facer ruiu, pa que too siguiere como siempre".