UVIÉU, 23 Nov. (EUROPA PRESS) -
L'Hospital d'Avilés comunicó esti llunes la detección d'un brotu de coronavirus, con 22 pacientes y 18 sanitarios afectaos. Los trés primeros casos detectáronse el sábadu pela tarde y les persones contaxaes son, na so mayoría, asintomáticos o con síntomes leves, menos trés persones que tuvieron que treslladar al Hospital San Agustín y con estáu "clínicamente bonu".
Según informó'l Conceyu d'Avilés en nota de prensa, esti brotu obligó a amenorgar l'actividá hospitalaria, polo menos esta selmana, suprimiendo quirófanos, pruebes y consultes ensin rellacionar con revisiones derivaes d'intervenciones quirúrxiques.
Na guardia médica del sábadu detectáronse 4 pacientes con fiebre a los que s'aplicó'l protocolu establecíu de separación y realización de la PCR. Al resultar positivos trés d'ellos, la dirección del hospital decidió realizar PCRs a tol personal (130) y a tolos pacientes (61).
Les pruebes al personal sanitario van acabar esti llunes y los resultaos de toes elles van conocese a la fin del día de güei o mañana a lo llargo de la mañana.
Namás detectase'l brotu, l'Hospital Avilés treslladó la situación al Hospital Universitariu de San Agustín, como hospital de referencia, a los servicios centrales del SESPA, a la Conseyería de Salú y informó de los casos al Serviciu de Vixilancia Epidemiólógica.
Les visites de familiares a pacientes hospitalizaos quedaron suspendíes dende esti domingu.
