Publicado 02/09/2015 19:55CET

Llanera trabaya na creación d'un serviciu de normalización llingüística

UVIÉU, 2 de Setiembre (EUROPA PRESS)

La Conceyala de Participación Ciudadana, Sanidá y Consumu de Llanera, Isabel Fernández Álvarez, caltuvo una xunta esta mañana col Director Xeneral de Planificación Llingüística y Normalización del Principáu d'Asturies, Fernando Padilla y con Lourdes Álvarez, de la Conseyería d'Educación, col oxetivu de soscribir un conveniu pa la normalización llingüística del Conceyu de Llanera.

Según informó Somos Llanera nuna nota prensa, nel Conceyu existe un acuerdu plenariu que data del añu 1998 nel que s'establez la cooficialidá del asturianu, "pero al que nun volvieron empresta-y atención les anteriores corporaciones municipales. La entrada de fuerces polítiques d'izquierdes nel Gobiernu de Llanera foi un revulsivo pa retomar esti tema".

Llanera va crear un serviciu de normalización col fin de tornar la documentación municipal, solicitúes, bandos, nómines, ordenances, etc. De la mesma manera van dase cursos al personal de l'alministración pa familiarizara cola llingua, con cuenta de cualquier persona puea dirixise a los funcionarios en cualquier de dambos idiomes.

Coles mesmes van ofrecese clases d'asturianu pa persones adultes y dinamizaráse l'espardimientu per parte de comercios, asociaciones y clubes deportivos de los sos anuncios n'asturianu, con cuenta de la población del conceyu se familiarice. Espérase que'l Gobiernu d'Asturies sovencione una gran parte del gastu destináu a personal nesti nuevu serviciu.