Mallada (PP) quier consiguir qu'Asturies vuelva ser una comunidá "de referencia" n'España

Teresa Mallada, Pablo Casado y Alfredo Canteli
DAMIÁN ARIENZA
Publicado 11/01/2019 17:47:50CET

UVIÉU, 11 Ene. (EUROPA PRESS) -

La candidata pol PP a la presidencia del Principáu, María Teresa Mallada, comprometióse esti vienres a trabayar tolo posible por qu'Asturies vuelva ser una comunidá autónoma "de referencia" n'España.

Mallada pronuncióse nestos términos nel actu de presentación de candidatos del partíu pal Gobiernu asturianu y pal Conceyu d'Uviéu. Tuvo arropada pol presidente del partíu, Pablo Casado, el vicesecretariu Javier Maroto, y la presidenta del PP d'Asturies, Mercedes Fernández.

Na so intervención, Mallada agradeció a Casado l'enfotu que depositaron n'ella. Esplicó que siempre se caracterizó por "facer equipu" y por recurrir al "diálogu" como ferramienta de trabayu.

"Tenemos que devolver la ilusión a los asturianos", ye ún de los oxetivos que se marca la candidata pa los díes próximos. "Tar n'Asturies ye tar na tierra que lluchó por caltener la esencia de nuestar nación", sorrayó, recordando que'l Principáu ye la rexón más querida nel restu d'España.

Lo que falta, dixo, ye poner en marcha midíes que contribuyan al desarrollu económicu y a garantizar la estabilidá y prosperidá. Pa eso, dixo, ta'l proyectu políticu del PP. "Toca trabayar duru", comprometióse. Amás dixo que va lluchar pa dar la oportunidá de volver a tolos asturianos que tuvieron que marchar buscando oportunidaes llaborales. "El nuestru proyectu ye l'únicu que puede facer ameyorar Asturies pa los que vivimos equí y facela curiosa pa los de fuera", añadió.

Contador