Publicado 29/04/2014 14:18CET

Más de 50 llibreríes participen na 35 Selmana de Les Lletres, orientada al cómic n'asturianu

La conseyera de Cultura, Educación y Deporte, Ana González
Europa Press

UVIÉU, 29 d'Abril (EUROPA PRESS)

La Conseyería de Cultura presentó esti martes la 35 Selmana de lES Lletres Asturianes, que va celebrase del 2 al 11 de mayu. Nesta ocasión la selmana va xirar sobre'l cómic n'asturianu, por cuenta de la celebración del 125 aniversariu de la publicación del primeru, un cuentu popular, obra del autor Pepe Prendes, publicáu nel primer númberu de 'La comedia gijonesa'.

Nesta edición, esplicó la conseyera Ana González en rueda prensa, van collaborar sobre 50 biblioteques asturianes que van ofrecer un descuentu del 10 por cientu nos títulos d'autores asturianos. Amás, van regalar un exemplar del cómic 'Dibuxando un camín', el ganchu de la conseyería col que pretenden "fomentar la llectura na llingua asturiana". Esti cómic ye la escoyeta de cuatro obres de los ganadores del premiu 'Alfonso Iglesias' nes ediciones del 2009, 2011, 2012 y 2013, los autores Ruma Barbero, Isaac del Rivero, J.A. Marines y Alfonso Zapico.

Los actos van empezar esti vienres, cola llectura pública de testos lliterarios en gallego-asturianu n'El Franco. Amás el martes 6 de mayu presentaránse los cinco llibros ganadores de los Premios Lliterarios 2013, 'Fame d'amor, determín de pasión', de Pablo Rodríguez Medina, 'Superficie del silenciu', de Ricardo Candás, 'Ya cuasi nunca lo facemos por amor. Conciencies mercenaries', de Beatriz Redondo, 'Tatuaxes nel corazón', de Marisa López y 'Cuadernos d'Ítaca', de Alfonso Zapico.

El Día de Les Lletres Asturianes, el vienres 9 de mayu, va representar nel Teatru de la Llaboral de Xixón el preestrenu del musical 'Nora, Mauro y los suaños', dirixíu al públicu d'educación primaria. Al otru día va estrenase a les 19.00 hores y la entrada va ser llibre hasta completar l'aforu.

A lo llargo de la selmana va haber más actos diriíos a los estudiantes de primaria, secundaria y universidá con cuenta de "llograr que l'asturianu seya la llingua vehicular y favorecer el so usu normalizáu", según indicó la conseyera, dao que "l'oxetivu marcáu de llograr l'usu del asturianu nun ta cumplíu al cien por cien".

Nesti sen González esclaró qu'en total unos 250.000 asturianos del millón d'habitantes que conformen la rexón empleguen l'asturianu como llingua cotidiana. "Hai una importante franxa que cubrir, polo que son necesaries les actividaes nes escueles pa normalizar l'usu", esplicó la conseyera.

Pa ello, sorrayó, hai una "ufierta obligada" d'Asturianu en tolos centros educativos y va haber otra asignatura ufiertada pal próximu cursu relacionada cola cultura asturiana. En total, ente alumnos de primaria y secundaria, hai n'Asturies 22.198 estudiantes que cursen asturianu mientres esti cursu 2013-2014, con una subida de 400 en centros públicos y 200 en centros concertaos.