Actualizado 05/09/2016 13:45 CET

Menéndez Blanco critica la falta de criteriu de munchos arqueólogos nel tratamientu de la toponimia tradicional

Andrés Menéndez Blanco.
UNIVERSIDAD DE OVIEDO

UVIÉU, 5 Sep. (EUROPA PRESS) -

L'investigador de la Universidá d'Uviéu Andrés Menéndez Blanco cuestiona'l tratamientu de la toponimia tradicional que fáen bona parte de los arqueólogos qu'estudien xacimientos nel occidente d'Asturies, y que la so práctica trai, al so xuiciu, importantes erros y imprecisiones, tanto no que se refier a nomes como a allugamientos xeográficos.

Menéndez Blanco coméntalo nun detalláu artículu sobre 'Toponimia y Arqueoloxía: dellos apuntes sobre'l so usu complementariu a partir d'esperiencies investigadores na Asturies occidental', publicáu n'asturianu occidental nel llibru 'Manuel Menéndez y l'Asturies Occidental', editáu pol Seminariu de Filoloxía Asturiana de la Unversidad d'Uviéu.

L'investigador esplica que'l tratamientu por parte de los arqueólogos de la toponimia "suel ser marxinal, y cuando recibe dalgunu, nun hai unos criterios d'actuación bien definíos". Comenta como "unu de los erros más comunes l'usu la toponimia presente na cartografía editada de les zones estudiaes, ensin una comprobación por aciu de trabayu de campu". Por esta razón, "munchos xacimientos tán publicaos con nomes que nun-yos correspuenden na realidá y que, por tanto, nun son definitorios de los mesmos". Cita como exemplos les mines romanes de La Cárcova y La L.lagarona, n'Allande, llamaes El Bachicón de Fresnedo y La Chaquerona de Villavaser en dalguna publicación de referencia sobre'l tema (Perea Caveda y Sánchez-PalenciaRamos, 1998: 103).

La falta d'una encuestación de campu trai, según Menéndez Blanco, tamién a interpretaciones forzaes. Asina, nun artículu dedicáu a la relación ente toponimia y arqueoloxía (Bardio Díaz y Fernández Irigoyen, 2005), "propónse que dellos topónimos menores d'Allande puen referise a restos megalíticos: Penas Forcadas (por Penaforcada), Penas Malas (por Peneosmalos) y Peneo Cortao". L'investigador apunta qu'estos casos "son de peñes naturales, como convida a pensar el mesmu términu 'pena', anque tean al llau de túmulos -que na zona identificquen col nome popular de tumbes-".

"Esta falta d'información de primer mano implica tamién erros na localización xeográfica de los nomes, como vemos na interpretación etimolóxica que se fai de la sierra de Carondiu, que partiría del mapa de restos pétreos de los túmulos comentaos", amiesta. "La inconsistencia de la propuesta maniiéstase al comprobar nel sitiu que Carondiu ye realmente'l nome del picu más altu de la zona y la estensión de la denominación a tola sierra ye recién y de calter alministrativu", comenta Blanco.

Na so opinión, "falta por tanto que los arqueólogos atiendan a la toponimia de la mesma manera qu'a les otres fontes usaes, aplicando unos criterios definíos d'usu". Pa Menéndez Blanco, "ye necesario que s'entienda la importancia de la fonte primaria como única válida y refúguense como recursos tolos trabayos que nun tengan un estudiu toponímicu detrás". "Tien qu'haber tamién una conocencia mínima de la llingua na que se forma'l topónimu pa representar ya interpretar correchamente", conclúi l'autor del artículu.

Asturianu ofrecido por