UVIÉU, 15 Feb. (EUROPA PRESS) -
La portavoz parllamentaria y presidenta del PP, Mercedes Fernández, alvirtió esti vienres en sede parlamentaria que "nun ye bono que'l secesionismu catalán marque l'axenda del Gobiernu y nesti casu sí marcó l'axenda del señor Pedro Sánchez".
"El separatismu catalán convocó güei verdaderamente les elecciones xenerales de toos pal 28 d'abril", indicó Fernández na so intervención nes entrugues al presidente del Principáu nel Plenu de la Xunta Xeneral.
La 'popular' pidió-y a Javier Fernández que fixera una valoración de los últimos acontecimientos protagonizaos pol Presidente del Gobiernu y pol separatismu catalán, pero l'anunciu de Pedro Sánchez de convocar elecciones modificó'l discursu de la presidenta de los 'populares' asturianos.
Mercedes Fernández consideró que depués de "la astracanada --babayonada--" de la figura del rellator, finalmente'l separatismu catalán marcó la convocatoria de les elecciones xenerales pal 28 d'abril, depués de "la rebelión a bordu del socialismu énte l'esparate que suponía esa figura".
Per otru llau, el presidente asturianu, Javier Fernández indicó que nunca escondió la so posición y esmolición colo que ta asocediendo en Cataluña y retrucó a la portavoz del PP que "desgraciadamente'l sececionismu catalán marcó l'axenda de los últimos gobiernos".
"Con too, yo manifesté munches veces la mio esmolición pol separatismu catalán. Creo que les identidaes y naciones tán n'abierta revisión, pero nun toi seguro de que yo nun tenga la mesma idea de la nación española que tienen ustedes o dalgunos de los sos amigos. Lo que si sé ye que nun tengo la mesma que los separatistes catalanes", dixo Fernández.
Asina, el presidente refirióse a la manifestación del domingu en Madrid convocada poles dereches y destacó qu'enantes d'esta manifestación última hubo otres muncho más multitudinaries vinculaes a valores morales como l'albuertu o'l matrimoniu homosexual y "sobre elles había banderes d'España, un mar de banderes".
"Eso siempres m'amusgó porque vi nelles esa idea de la derecha que querer namás pa sí la bandera, los símbolos y mesmo el nome d'España y eso esmolezme muncho, esmolezme que vuelva pasar", dixo.
Sobre les discrepancies col Gobiernu de Pedro Sánchez que-y echó en cara la portavoz del PP, Sánchez indicó que nun esconde que siempre "tuvo discrepancies polítiques col partíu" y asina les punxo de manifiestu y retrucó que per otru llau, les discrepancies de la presidenta del PP col so partíu nun son polítiques, "son d'otra naturaleza por eso meyor nun afondar nesa circunstancia".
