UVIÉU, 30 Sep. (EUROPA PRESS) -
El presidente del Principáu y secretariu xeneral de la Federación Socialista Asturiana (FSA), Adrián Barbón, reivindicó esti vienres el modelu de primaries del so partíu, nel que son los militantes los qu'escueyen a los candidatos. "A min nun me designaron dende un despachu en Madrid y por eso tampoco nun puen quitame dende ellí", comentó.
Barbón pronuncióse nestos términos un día depués de que la presidenta del PP d'Asturies, Teresa Mallada, confirmara que nun se diba a presentar al congresu del so partíu.
Anque'l socialista dixo que nun va dicir al PP cómo tienen que proceder, añadió que nel PSOE tienen "otra forma de proceder" y que él mesmu foi escoyíu secretariu xeneral de la FSA-PSOE col votu directu de la militancia socialista. Estos díes, recordó, tán en marcha dos procesos de primaries pa escoyer a candidatos socialistes en Xixón y Uviéu.
"Les decisiones nun s'adopten en Madrid nin nos dicen dende ellí lo que tenemos que facer", indicó. "A min punxéronme los militantes de la FSA-PSOE y van ser ellos los que me quiten", añadió'l dirixente socialista.
Barbón, que dixo que siguió en directo la comparecencia ensin entrugues de Teresa Mallada el día anterior, reconoció, sicasí, qu'él quier más qu'haya un PP "fuerte" enantes qu'ún debilitáu.
"Quiero más un PP fuerte a una estrema derecha fuerte, pa que nun pase como n'Italia", dixo en referencia al resultáu electoral de Giorgia Meloni n'Italia.
Barbón recordó qu'hai quien piensa que si se fortaleciera la estremaderecha, el PSOE ganaría les elecciones en 2023 con más distancia. "Pero nin asina; quiero más ganar dalgo mas xusto sobre'l PP y gobernar", dixo.
El presidente d'Asturies fixo estes declaraciones a entrugues de los periodistes enantes de visitar la esposición Cuadonga al traviés del arte, que forma parte de la programación diseñada pol Gobiernu d'Asturies pa conmemorar los 1.300 años de la batalla.
