UVIÉU, 27 May. (EUROPA PRESS) -
Un home de 57 años morrió y otru, de 35 años, ta mancáu depués de salise de la vía'l vehículu nel que viaxaben, en circunstancies que se desconocen, na A-8, na rotonda d'accesu a la localidá de Coceña, en Colunga, según informó'l Serviciu d'Emerxencies del Principáu d'Asturies (SEPA).
Según los datos facilitaos pol Serviciu d'Atención Médica Urxente (SAMU), al mancáu atendiólu l'equipu médicu de la UVI-móvil de Les Arriondes y treslladáronlu, con pronósticu reserváu, pa más pruebes al Hospital del Oriente. Hasta'l llugar tamién foi l'equipu d'Atención Primaria de Colunga cola ambulancia de soporte vital básicu de Ribeseya.
Tanto al mancáu, conductor del turismu, como al fináu que viaxaba como acompañante, tuvieron qu'escarcelalos del interior del coche por efectivos de Bomberos del Serviciu d'Emerxencies del Principáu d'Asturies (SEPA) con base nos parques de Villaviciosa y Llanes.
N'estabilizando'l turismu que quedó entornáu llateralmente sobre'l llau esquierdu y en coordinación colos equipos sanitarios, los bomberos cortaron el techu del coche y sacaron al varón fináu pa poder, depués, acceder hasta'l mancáu y escarcelalu.
El Centru de Coordinación d'Emerxencies recibió l'avisu a les 01.14 hores d'esta madrugada. Na llamada indicaben qu'hai un vehículu entornáu y nel so interior había dos persones atrapaes.
