Actualizado 16/02/2011 19:02 CET

El Museo Etnográficu del Oriente acueye la presentación del volume númberu 5 del Atlas Sonoru de la Llingua Asturiana

UVIÉU, 16 de Febreru (EUROPA PRESS)

El Muséu Etnográficu del Oriente d'Asturies (Porrúa, Llanes) va acoyer esti xueves 17 de febreru del 2011, a les 12.00 hores la presentación del volume númberu 5 del Atles Sonoru de la Llingua Asturiana, editáu pola Rede de Museos Etnográficos d'Asturies y el Muséu del Pueblu d'Asturies, según informó la organización.

A la presentación van asistir Juaco López Álvarez, director del Muséu del Pueblu d'Asturies; Jesús Suárez López, responsable del Archivu de la Tradición Oral d'esti muséu y de la edición del Atles Sonoru de la Llingua Asturiana; Pilar González Lafita, directora de la Fundación Municipal de Cultura, Educación y Universidá Popular de Xixón, y Consuelo Vega, directora xeneral de Política Llingüística de la Conseyería de Cultura y Turismu del Principáu d'Asturies.

Esti quintu volume ta dedicáu a la fala del oriente d'Asturies (conceyos de Ponga, Amieva, Cangues d'Onís, Onís y Cabrales) y ufierta una serie de grabaciones de campu que muestren la fala viva de la zona al traviés de lleendes y cuentos, relatos etnográficos y históricos tresmitíos oralmente, y qu'agora, en virtú de la so edición sonora, pasen a ser una manifestación tanxible del patrimoniu inmaterial d'Asturies.

El CD d'audiu acompáñase d'un llibretu cola descripción de los fenómenos llingüísticos más relevantes del oriente d'Asturies y la trescripción de toles grabaciones sonores, según mapes de llocalización y fotografíes de los informantes.

Esti quintu volume del Atles Sonoru de la Llingua Asturiana marca un fechu importante nel plan xeneral d'esta obra, que se vien editando dende l'añu 2003, pues con él abárcase tola xeografía asturiana. Les grabaciones incluyíes nos cinco volumes publicaos hasta la fecha abarquen tol cordal asturianu.

Caún d'estos "documentos sonoros" ufierta un exemplu concretu de fala dotáu de conteníos relevantes pa la investigación y la enseñanza de la llingua asturiana en tolos sos niveles. Coles mesmes, "caún d'estos documentos" reflexa un conxuntu de saberes patrimoniales y cumple, amás, una función lúdica, que dota al Atles Sonoru de la Llingua Asturiana d'una apreciable dimensión pedagóxica y tornalu nuna ferramienta imprescindible pa una meyor conocencia de la llingua y la cultura asturianes.

Asturianu ofrecido por