UVIÉU, 13 Nov. (EUROPA PRESS) -
L'autor gallardonáu col XI Premiu María Josefa Canellada de Lliteratura Infantil y Xuvenil, Lluis Aique Iglesias Fernández, diz que la obra premiada, 'Invisibles', ye una historia de mieu que trata "sobre'l deséu de los adolescentes de ser invisibles pa la sociedá".
El premiu ta concedíu pol Gobiernu d'Asturies y ente les obres presentaes, el xuráu decidió conceder el premiu a 'Invisible', que se presentó col seudónimu Mon Llera Tardi, al reconocer nella "un tratamientu de temes d'actualidá con personaxes reales, con una bona estructura narrativa y un estilu lliterariu enllenu d'imáxenes simbóliques", según destaca l'acta.
En declaraciones a Europa Press, Iglesias Fernández esplicó que la novela ta protagonizada por un adolescente y les sos rellaciones col mundu que lu arrodia, "dende la sociedá en xeneral a los pas en particular". La "novelina curtia o cuentu grandón", como diz l'autor, fala del deséu del adolescente de ser invisible pal restu de la sociedá. En metá de tou esto, un personaxe escuru que-y da'l puntu de mieu a la novela.
Iglesias Fernández esplicó que, polo temática, enantes de presentar 'Invisibles" al gallardón decidió da-ylu a lleer a un amigu pa ver si podía ser afayadizu pa un públicu más mozu. Dalgo que'l xuráu del premiu parez que tuvo claro al decidir concede-y el Josefa Canellada, un premiu que l'autor recibe como una "allegría" y como "inyección d'autoestima y moral".
