Pablo González califica de "fracasu" el Plan de Normalización del Asturianu por nun tener demanda social
XIXÓN, 14 Dic. (EUROPA PRESS) -
El portavoz del PP de Xixón, Pablo González, remarcó que nun existe demanda social del usu del asturianu na ciudá, polo qu'esplicó que nun van apoyar campañes pagaes con dineru públicu de tolos xixoneses pa protexer un 'satus quo' d'una minoría, mui minoría, que centra la so manera de vida nesto y qu'aprovecha pa enredar y insultar.
"Perriba del nuestru cadabre", alvirtió en rueda de prensa nel Consistoriu, onde señaló esti vienres qu'a pesar de que'l PP defende tolo que tenga que ver cola historia del asturianu y la llibertá de cada cual d'usalo, nun tán a favor de dar "nin un recursu más pa esta pantomima".
Ye por eso, que van votar en contra de tolo que sía siguir inyectando dineru públicu nesto, que pa él nun ye una prioridá. El 'popular', nesti sentíu, echó mano de los datos y dixo qu'en 2017, de 18.000 comunicaciones que los xixoneses fixeron col Conceyu, namás dos foron n'asturianu, mentes qu'en 2018 de 28.258, namás cinco (0,017 por cientu).
Según él, cuando "s'inventen" estudios d'autores allegaos, como los que dicen qu'un 50 por cientu usen l'asturianu con normalidá pa siguir cobrando del dineru públicu, "hai qu'enfrentalos cola realidá".
Amás, incidió en que'l Plan de Normalización del Asturianu de Xixón "ye un fracasu". Matizó, eso sí que sí tán d'alcuerdu en que se siga promocionando dende la Fundación Municipal de Cultura (FMC) l'asturianu y que se caltenga y promocione la cultura tradicional, que ye parte de la historia d'Asturies y d'España, "y nin más nin menos".
Entá más, pidió a toes estes persones, qu'al so xuiciu aprovéchense de recursos públicos dende una demanda social "falsa", que pidan esculpes a tolos xixoneses, "que tán fartos d'imposiciones". "Cada cual que se dea por aludíu", añadió.
Dixo que cuando se faen campañes de descalificación al PP y a los que nun piensen como ellos, tamién pagaes con dineru público según él, "caen soles cuando les enfrentes colos fechos".
Apostó, por eso, por "desmontar la burbuya del asturianu, que ye una falacia". Pa González, ye "una tomadura de pelo" los cientos de miles d'euros pagaos. Asina, apuntó que'l Conceyu anguaño destinó 400.000 euros al asturianu, ente'l Plan de Normalización, la Oficina de Política Llingüística y subvenciones al texíu asociativu que fomenta l'asturianu. Un asturianu que'l portavoz 'popular' calificó "de llaboratoriu"
González avanzó que nun van apoyar renovar el Plan de Normalización del asturianu, que termina'l 31 d'avientu de 2019, de la qu'abogen por amenorgar "a la mínima espresión" la Oficina de Política Llingüística, p'atender a les piticiones de comunicación n'asturianu. Nun ve mal, per otru llau, l'usu de la toponimia oficial, porque ye la oficial, o que'l Conceyu faiga comunicaciones n'asturianu, xunto al castellanu.
"Intentan normalizar dalgo que nun ye normal na cai", apuntó, pa dicir depués que'l fomentu del usu social del asturianu nun ta funcionando, d'ehí que lo tán "imponiendo", según él. Nesti sentíu, calificó tamién de "fracasu" el Conseyu Asesor de la Llingua.
A esto sumó que, pa él, dar recursos públicos a entidaes que se dediquen a fomentar dalgo que nun tien demanda social ye "tirar el dineru, y más cuando se dedica "a enredar y insultar".
