UVIÉU, 16 Oct. (EUROPA PRESS) -
El Plenu del Conceyu de Grau aprobó esti una martes una proposición d'alcuerdu p'apoyar la iniciativa de modificar el reglamentu de la Xunta Xeneral y nun s'impida usar l'asturianu. La midida cuntó col votu favorable de PSOE y IX y el 'non' de PP y Ciudadanos.
Nesi sentíu, l'alcuerdu solidarízase cola conseyera de Cultura, Berta Piñán, depués "del atropellu a les llibertaes que vivió" nel Parllamentu asturianu pol "vetu al usu de la llingua asturiana".
L'alcuerdu establez amás que los fechos "basáronse nuna interpretación forciada del reglamentu na que namás los diputaos tendríen el derechu a espresase n'asturianu". Una posición que consideren "d'intransixencia" y de "despreciu" hacia l'asturianu.
Por eso, treslladen la so solidaridá a la conseyera de Cultura, Política Llingüística y Turismu y súmense a la iniciativa parllamentaria que quier cambiar el reglamentu "lo enantes posible si ye que torga l'usu de la llingua patrimonial de la rexón nel parllamentu asturianu".
El plenu posicionase asina depués de la polémica que se xeneró cuando la Mesa de la comisión de Cultura, Política Llingüística y Turismu torgó a la conseyera del área, Berta Piñán, comparecer n'asturianu.
La Mesa, presidida pola socialista Lidia Fernández, asina lo fixo en consultando colos servicios xurídicos, apelando a los derechos que tienen los diputaos a entender les intervenciones. PP y Vox --posteriormente tamién Ciudadanos--manifestaren la so oposición a que Piñán interviniera n'asturianu.
El reglamentu vixente de la Xunta indica que "nel marcu de lo qu'establez l'Estatutu d'Autonomía y, nel so casu, la llexislación que lo desarrolla, los Diputaos van poder utilizar el bable nel exerciciu de les sos funciones parllamentaries".
El testu nuevu propuestu por IX señalaría que "nel marcu de lo qu'establez l'Estatutu d'Autonomía y, nel so casu, la llexislación que lo desarrolla, tanto los Diputaos nel exerciciu de les sos funciones parllamentaries como cualesquier otra persona que compareza énte la Cámara van poder utilizar el bable/asturianu".
