UVIÉU, 24 Jun. (EUROPA PRESS) -
La diputada de Podemos na Xunta Xeneral del Principáu Lorena Gil amosó esti llunes el so malestar depués de que la so formación política nun llograra representación na Mesa de la Xunta. Según Gil, la razón de la so esclusión ye que la formación morada podría ser incómoda pa grupos como'l PSOE asturianu, que pretenden impulsar midíes dende l'órganu qu'impliquen "ganar más y trabayar menos".
En declaraciones a los periodistes nos pasiellos de la Xunta Xeneral, Gil afirmó que nes conversaciones cola Federación Socialista Asturiana (FSA)-PSOE los socialistes ufiertáron-yos añadir una serie de complementos salariales y tamién d'amenorgar la carga de trabayu parllamentariu, pasando a la metá. "Nós nun tábamos d'alcuerdu", señaló.
Según Lorena Gil, lo "lóxico" sería que la so formación tuviera un sitiu na Mesa, al ser la cuarta formación con más votos. Considera que siempre apostaron pola pluralidá nel órganu de gobiernu de la Xunta Xeneral.
Llamentó'l resultáu de la votación, y responsabilizó al "PSOE nuevu d'Adrián Barbón" de configurar una Mesa "menos plural" que la qu'existía col Executivu de Javier Fernández.
Detrás del alcuerdu de la Mesa, Gil considera qu'existe un pactu de cuatro formaciones, n'alusión a PSOE, PP, Ciudadanos y IX pa cobrar más y amenorgar la frecuencia y intensidá de plenos y comisiones.
