UVIÉU, 25 Mar. (EUROPA PRESS) -
Podemos Asturies va donar al colectivu Transire el dineru qu'Hazte Oír tuvo qu'abonar a Daniel Ripa pol pagu de les costes xudiciales del recursu d'apelación énte l'archivu de la causa contra'l secretariu xeneral de la formación morada.
Con esi presupuestu Transire va entamar esti sábadu n'Uviéu, coincidiendo col Día de la Visbilidad Trans, la presentación del llibru 'Vestidas de azul', de la periodista y escritora Valeria Vegas. Va ser a les 19.00 hores n'El Manglar, según anunciaron esti llunes el secretariu xeneral de Podemos Asturies, Daniel Ripa, y la representante de l'asociación Transire Asturies, Berta Jeannique.
Foi'l Tribunal Superior de Xusticia d'Asturies (TSXA) el qu'alcordó'l sobreseimientu provisional y l'archivu de la causa contra'l secretariu xeneral de Podemos n'Asturies, Daniel Ripa, pol incidente col autobús d'Hazte Oír en mayu de 2017. L'asociación presentó un recursu d'apelación que se desestinó y impunxo el pagu de les costes xudiciales del recursu mentáu.
Son un total de 270 euros qu'agora Daniel Ripa va donar multiplicáu por trés --hasta un total de 811 euros-- y que van permitir la financiación d'esti actu. "Ye un exerciciu de memoria histórica mui importante pa visibilizar la memoria de les que foron les nuestres madres y nos allanaron el camín pa güei poder vivir con mayor llibertá n'España", señaló Jeannique.
Per otru llau, Ripa mostró'l contentu por que'l Gobiernu central aprobara qu'Hazte Oír dexe de ser una entidá d'utilidá pública. Amás, reclamó que cada denuncia d'esta asociación dedicada "a fomentar l'odiu y lluchar contra la igualdá" valga "pa facer más fuerte'l movimientu trans y el feminista".
Con too, el secretariu xeneral de Podemos Asturies volvió llamentar que nesta llexislatura nun saliera alantre la Llei Trans asturiana, una situación que calificó "d'oportunidá perdida" y de la que culpabilizó a PSOE, PP y Foru por votar en contra de la tramitación d'urxencia y llevar "a una llexislatura perdida" en materia de derechos y "que síamos más vulnerables a estos intolerantes que quieren volver con más fuercia".
