Actualizado 31/03/2017 04:04

El poemariu 'Un vasu d'agua', d'Ángeles Carbajal, gana'l premiu Xuan María Acebal de Poesía

UVIÉU, 21 de Payares (EUROPA PRESS)

La escritora sierense María Ángeles Carbajal Roza resultó ganadora de la vixésima segunda edición del Premio Xuan María Acebal de poesía n'asturianu col poemariu 'Un vasu d'agua'. El galardón, que concede la Conseyería d'Educación y Cultura, ta dotáu con 3.000 euros.

Ente les obres presentaes, el xuráu decidió por unanimidá conceder el premiu al so poemariu, que, según esplica l'acta, "trátase d'una reflexón empática, na que'l tonu unitariu, intensu y coherente de la voz poética, a lo llargu de la obra, emociona al llector". La obra presentóse baxo'l seudónimu *La ponte*. Abierta la plica, l'autora ganadora resultó ser María Ángeles Carbajal Roza.

La escritora, en declaraciones a Europa Press, confesóse "encantada de la vida" al conocer la noticia. Carbajal, que yá ganó esti mesmu premiu na so edición del 2014 con 'L'aire ente la rama' (el so últimu llibru publicáu), valora consiguilu una vez más más porque "nun ye fácil". "Hai autores en 'llingua asturiana' bien bonos, que trabayen muncho y qu'escriben perbién, lo cual potencia la lliteratura n'asturianu", añadió.

Sobre la obra ganadora, esplicó qu'inclúi cerca de mediu centenar de poemes que "nacieron al pasu de los díes sin constituyir un proyectu previu". Reflexa nellos esos momentos d'apaciguadura, de pensamientu, de ensuañu, al estilu de Rosseau, nos que nos paramos a contemplar un paisaxe o tomamos un vasu d'agua en metá de la nueche".

"Na so obra xúntense la contemplación, la emoción y la reflexón, nun exerciciu de necesidá imperiosa pa la poesía, que ye tener la capacidá de pensar la emoción y d'emocionar col pensamientu, como yá dixo nel so día Miguel de Unamuno", comentó Carbajal.

Nos versos de 'Un vasu d'agua' "hai un pesu específicu pal diálogu de la soledá humana y la condena a la mortalidá col restu de la naturaleza, de lo vivo que ta más cercanu a nós". Y tamién, añadió, tán les temes eternos de la poesía: "la vida humana y el pasu del tiempu".

El xuráu encargáu de valorar les ocho obres finalistes tuvo presidíu pol director xeneral de Planificación Llingüística y Normalización, Fernando Padilla Palicio, y integráu polos escritores Lourdes Álvarez García, Antón García Fernández, Héctor Pérez Iglesias, Xuan Santori Vázquez y Solinca Turbón Cuesta.

A esti gallardón podíen presentase poemarios de tema, xéneru y estructura llibres escritos en llingua asturiana con una estensión mínima de quinientos versos, siempre que foren inéditos y non premiaos n'otros concursos.

María Ángeles Carbajal Roza, (Argüeyes, Siero, 1959) ye llicenciada n'Hestoria del Arte pola Universidá d'Uviéu y collaboradora de les revistes Clarín, Lliteratura, Reloj de Arena o Anáfora, ente más otres. Ye autora de los poemarios en castellanu La caligrafía de la distancia (1993) y La sombra de otros días (2002), y de los poemarios n'asturianu En campu abiertu, (col qu'algamó nel 2012 el Premiu *Teodoro Cuesta* de Poesía ) y L'aire ente la rama (col qu'algamó nel 2014 el Premiu *Xuan María Acebal* de Poesía, recibiendo asina mesmo nel 2015 el premiu al meyor llibru del añu n'asturianu qu'otorga la Tertulia Malory)

Asturianu ofrecido por