19 de febrero de 2020
 

El PP diz que les cuentes de Barbón son continuistes y namás atienden a la estructura del Principáu

Publicado 10/12/2019 16:06:58CET
Pablo González en la sala de prensa de la Junta General.
EUROPA PRESS

UVIÉU, 10 Dic. (EUROPA PRESS) -

El diputáu del grupu parllamentariu del PP, Pablo González, quixo facer esti martes un primer analís de les cuentes presentaes pol Gobiernu d'Adrián Barbón pal exerciciu próximu, a les que se refirió como los presupuestos de Javier Fernández, "porque son un continuismu absolutu de les cuentes del gobiernu anterior".

"La conclusión ye de fracasu y decepción con un presupuestu que namás va allargar l'agonía lenta que vive esta rexón porque nun hai nin un chisgu a una política que suponga un revulsivu, ye lo mesmo de siempre, colos mesmos de siempre que van dar los resultaos de siempre", dixo González, qu'indicó que ye "de xacíu" que van presentar una enmienda a la totalidá.

Añadió que tamién van presentar enmiendes parciales, anque ye un "presupuestu malu que difícilmente se pue ameyorar". Y ye que según el PP, por más que Barbón s'empeñó en poner trincheres y barreres col Executivu anterior esti ye un presupuestu netamente continuista".

Pablo González aseguró que cuando s'analicen les cuentes parez que "nun hai naide al mandu de la nave". "Si hai un bon trabayu técnicu y contable pero nun hai una clara dirección política al mandu de esti presupuestu", destacó.

Y ye qu'a xuiciu del PP estes cuentes tienen un beneficiariu claru que ye la mesma estructura del Principáu, porque se trata d'unes cuentes pensaes pa engrosar esa estructura improductiva de l'alministración, mentes que'l gran perxudicáu son los asturianos.

"Ye un presupuestu por demás egoísta que se mira l'embelicu y nun mira a los ciudadanos", indicó Pablo González que punxo dellos exemplos de recortes en partíes fundamentales pa los ciudadanos. Asina por exemplu indicó que les partíes d'ayudes a los conceyos cunten con 2,3 millones d'euros menos.

Tamién se refirió al abandonu al que se somete'l patrimoniu del Principáu con edificios que caen a cachos mentes se "carguen" el 70% de la partida destinada al so caltenimientu. "Enllénase-yos la boca col apoyu a l'Asturies rural pero nin un duru más-y destinen 13 millones d'euros menos al sector primariu", indicó.

González dixo amás que la mayor parte del plus del dineru pa 2010 sal del bolsu de los asturianos. "Son 93 millones d'euros más que l'Alministración va recaldar y que se destinen a pagar más sueldos, caltener la estructura burocrática de l'Alministración y pa tresferencies a caún de los organismos que componen el mesmu Principáu d'Asturies", dixo.