UVIÉU, 15 Oct. (EUROPA PRESS) -
Les biólogues Joanne Chory y Sandra Myrna Díaz, gallardonaes col Premiu Princesa d'Asturies d'Investigación Científica y Técnica 2019, alertaron esti martes de la catástrofe que supón que'l cambiu climáticu tea produciéndose trés veces más rápidu de lo imaxinao. Apunten a qu'existen "intereses económicos y políticos claros" detrás d'ello.
"La mayor parte de la xente niega'l papel del home nel cambiu climáticu pero los datos tán ehí, demuestren que ta asocediendo y hai que facer dalgo", destacó Chory na rueda de prensa nel Hotel de La Reconquista d'Uviéu.
Díaz esplicó que detrás de la negación del cambiu climáticu "hai dalgo que ye bien simple, intereses económicos y políticos claros". Los intereses económicos empiecen negando un problema, cuando se tresforma n'innegable empiecen duldando de la evidencia", añadió.
Al so xuiciu, col cambiu climáticu hai "negacionismu" pero "considerablemente menor" qu'hai años porque, según señaló, "el pesu de la evidencia ye grande". Tamién falaron de la crisis de la biodiversidá, que existe a pesar del "negacionismu" que xeneralmente vien de "les mesmes canales políticos y dacuando de les mesmes cares".
Nesti sentíu Díaz recordó que "ta en manes de la sociedá decidir si van desaniciar o non el millón d'especies d'animales y plantes que s'atopen nel mundu en peligru".
Dambes falaron de l'activista medioambiental sueca centrada nos riesgos planteaos pol cambiu climáticu, Greta Thunberg. "Ye la cara visible d'un enorme movimientu de la mocedá en munches ciudaes del mundu y ye un síntoma de qu'hai dalgo nuevu y de qu'hai dalgo podemos faer", precisó Díaz.
