El presupuestu dedicáu a la promoción del asturianu xube un 9%

Publicado 04/12/2018 18:03:18CET
EUROPA PRESS

UVIÉU, 4 Dic. (EUROPA PRESS) -

El conseyeru d'Educación y Cultura, Genaro Alonso, presentó esti martes na Xunta Xeneral les cuentes del so departamentu recoyíes nel proyectu de Llei de Presupuestos pa 2019, que xube a 837.685.097 euros, un 6,08% más qu'anguaño. La promoción del asturianu supón 1,7 millones d'euros, un 9% más qu'anguaño.

Alonso calificó'l presupuestu de "espansivu a les clares" que ta "nel polu opuestu de les polítiques d'austeridá" que demuestra que pal Executivu "la educación y la cultura son una "prioridá", como al so xuiciu muestra que la so cartera sía la segunda con más recursos.

El presupuestu acuta 2.400.000 euros pa les oposiciones al cuerpu de maestros, con una ufierta pública d'empléu de 781 places en siete especialidaes. Per otru llau, la vuelta a les 18 hores pactada colos sindicatos va suponer una inversión de 5,7 millones.

La financiación d'Educación Infantil algama los 16,2 millones y van financiar l'amenorgamientu del 50% de les cuotes de les families, "colo qu'Asturies conviértese na comunidá colos precios más baxos d'esti serviciu", indicó Alonso. Amás, van abrise escueles nueves nos conceyos que lo necesiten, amás d'aumentar la ufierta de los centros qu'asina lo soliciten

Genaro Alonso destacó un "apoyu decidíu" al deporte y a la cultura asturiana, onde s'inclúin 112.500 euros pa diversos tramos del Camín de Santiago, 493.059 pa caltenimientu y restauración de bienes patrimoniales catalogaos, albergues del Camín de Santiago y horros, paneres, cabazos o otros elementos etnográficos, amás de 130.000 euros pal Arte Asturianu.

Per otru llau, la Biblioteca Pérez de Ayala (Uviéu) y la Xovellanos (Xixón) van cuntar con 110.000 euros pa la compra de llibros, frente a los 45.000 del exerciciu actual. Tamién s'inclúin 250.000 euros pa que los conceyos contraten espectáculos teatrales.

P'acabar, no que tien que ver cola normalización llingüística, el conseyeru esplicó n'asturianu que la partida xube un 9,01% , con un conceptu nuevu dedicáu a la promoción del asturianu en RTPA qu'inclúi 70.000 euros.

Per otru llau, la partida dedicada a subvenciones va xubir 57.440 euros, lo que va permitir crear un serviciu de normalización llingüística nuevu en Ribeseya y caltener les partíes dedicaes a la promoción polos Conceyos, los medios de comunicación, na música y a la edición de llibros. En total, les subvenciones xuben en 57.440 euros.

Amás, va medrar la dotación pa los Premios Lliterarios y la tresferencia a l'Academia de la Llingua Asturiana, que según recordaron dende'l Principáu nos postreros trés años medró en 37.500 euros.