UVIÉU, 24 Nov. (EUROPA PRESS) -
El conseyeru de Mediu Rural y Cohesión Territorial del Gobiernu asturianu, Alejandro Calvo, dixo esti martes que l'Executivu autonómicu ta analizando la posibilidá de construyir un muelle na marxe derecha del puertu de Llanes.
Pa eso, según esplicó Calvo nel parllamentu asturianu énte una pregunta del PP, contratóse por 15.000 euros un estudiu pa evaluar esa posibilidá y aumentar asina la capacidá pa embarcaciones profesionales.
Calvo dio cuenta de delles actuaciones que se realizaron nel puertu de Llanes y qu'inclúin un dragáu nel esterior de la dársena, unes obres que van acabar nunos díes, según esplicó.
Tamién dixo que se trabaya n'ameyorar la illuminación, puntu ésti nel qu'insistió'l diputáu del PP Álvaro Queipo. Con too, y de cara a actuaciones futures nel puertu llaniscu, Calvo aprovechó la ocasión pa pidir a los parllamentarios que dean el so apoyu al proyectu de presupuestos de 2021, que bien ceo va entrar na Cámara pa la so tramitación.
Na so intervención, Queipo amosóse "sosprendíu pola ineficacia" del Executivu asturianu y dixo que solo s'axudicó un 40 per cientu de lo que presupuestara anguaño pa puertos asturianos. Calvo esplicó que'l nivel d'execución tien que ver cola pandemia y dixo que'l porcentaxe va xubir d'equí a final d'añu.
