UVIÉU, 22 Oct. (EUROPA PRESS) -
El conseyeru de Ciencia, Innovación y Universidá del Gobiernu d'Asturies, Borja Sánchez, garantizó esti xueves el so compromisu col campus de Mieres de la Universidá d'Uviéu. "Repito'l nuestru apueste por consolidar el Campus de Mieres y dotalo de más conteníu", dixo.
Sáchez pronuncióse nestos términos en respuesta a una interpelación realizada nel plenu de la Xunta Xeneral pola portavoz d'IX, Ángela Vallina, que demandó más apoyu pal Campus de Mieres. Vallina criticó al rector de la Universidá d'Uviéu, Santiago García Granda, por pidir al Conceyu de Mieres que se fixera cargu de parte de la financiación que suponen los graos nuevos.
Nesi puntu, sicasí, nun entró Sánchez, que mostró la so confianza "dafechu" na autonomía universitaria a la de proponer los meyores allugamientos.
El dirixente asturianu insistió en que'l Gobiernu asturianu impulsa una collaboración "lleal y constructiva" cola Universidá d'Uviéu a la que va ameyorar la financiación y va acometer llabores como l'amenorgamientu de la burocracia existente.
La puesta en marcha en Mieres d'un centru mistu d'investigación, añadió, va valir pa dinamizar el campus mentáu, pola capacidá que va tener a la d'atraer a otros grupos d'investigación. "El compromisu col Campus de Mieres nun almite debate", señaló.
