Publicado 04/06/2019 17:20CET

El Principáu convoca los premios lliterarios y de teatru profesional n'asturianu y gallego-asturianu

UVIÉU, 4 Jun. (EUROPA PRESS) -

El Boletín Oficial del Principáu d'Asturies (Bopa) publicó la convocatoria de los premios lliterarios n'asturianu que promueve la Conseyería d'Educación y Cultura. El plazu de presentación termina'l 3 de xunetu pa obres dramátiques, el 2 de setiembre na modalidá de cómic y el 16 del mesmu mes pal restu d'opciones.

Estos premios son el 'Xosefa Xovellanos' de novela, na so cuadraxésima edición; 'Xuan María Acebal' de poesía, na so vixesimoquinta edición; 'Máximo Fuertes Acevedo' d'ensayu, na so vixesimoquinta edición; 'María Josefa Canellada' de lliteratura infantil y xuvenil, na so decimosegunda edición, y 'Alfonso Iglesias' de cómic, na so decimoprimer edición.

Según indicó'l Principáu al traviés d'una nota de prensa "estos gallardones, que contribúin a potenciar, consolidar y arriquecer la creatividá de la llingua asturiana nel ámbitu lliterariu, aumentaron anguaño la so dotación hasta los 5.000 euros". El plazu de presentación d'orixinales termina'l 2 de setiembre na modalidá de cómic y el 16 del mesmu mes pal restu.

Nel Bopa del 3 de xunu tamién puede consultase la convocatoria de la tercer edición del Premiu 'Nel Amaro' de teatru profesional n'asturianu o gallego-asturianu, dotáu con 6.000 euros, pa obres yá estrenaes y representaes en cualesquier d'estes dos llingües, tanto obres orixinales como versiones o adaptaciones d'otros títulos.

El plazu de presentación conclúi'l 3 de xunetu de 2019 y los finalistes van participar nel III Festival de Teatru Nel Amaro, que se va celebrar nel Teatru Filarmónica d'Uviéu los díes 8, 15, 22 y 29 de payares, nos que se van representar les obres qu'opten al premiu.

P'acabar, la Conseyería d'Educación y Cultura convocó'l 28 de mayu les subvenciones a empreses editoriales pa la promoción del llibru n'asturianu o gallego-asturianu. Trátase d'ayudes económiques pa la edición de llibros orixinales o traducíos, que pola so calidá y interés contribuyan a la normalización social de la llingua y l'arriquecimientu de los sos fondos bibliográficos. La cuantía total ye de 100.000 euros, una cantidá que tamién creció en comparanza col añu anterior, y el plazu de presentación de proyectos remata'l 26 de xunu.

Asturianu ofrecido por