Crítiques dures na Xunta Xeneral de Podemos y Ciudadanos a la xestión del conseyeru d'Empléu, Industria y Turismu, Isaac Pola
UVIÉU, 16 Oct. (EUROPA PRESS) -
El conseyeru d'Empléu, Industria y Turismu del Gobiernu asturianu, Isaac Pola, refirióse esti martes a la supresión de determinaes llinies aérees con Asturies de compañíes como Easyjet o Tap. Pola dixo que nun-y queda más remediu que respetar eses decisiones empresariales por mor del "llibre mercáu".
Pola compareció nuna comisión parllamentaria na Xunta Xeneral, na que los representantes de Podemos y de Ciudadanos cargaron duramente contra la so xestión no relativo a esti asuntu.
"Esto ye la consecuencia del llibre mercáu pa una rexón periférica como Asturies, que tien poca población", señaló'l dirixente asturianu, que dixo que les sos competencies llíndense a habilitar convenios de promoción turística, con una llicitación que ta en marcha. Pola refugó cualquier tipu de responsabilidá no que se refier a la decisión de les compañíes que decidieron dexar d'operar n'Asturies.
Pola almitió'l preciu altu de los vuelos ente Asturies y Madrid qu'existe anguaño y que'l Gobiernu rexonal tamién lu sufren. Mostróse partidariu d'estudiar si puede regulase de dalguna manera.
Énte esta situación, dixo que'l Gobiernu asturianu pidió la convocatoria del Comité de Coordinación Aeroportuaria, onde tán representaos Fomentu, AENA, axentes sociales y tamién el Gobiernu del Principáu. Repitió que les competencies en tresporte aéreu son del Ministeriu de Fomentu.
CRÍTIQUES DURES
La diputada de Podemos Lorena Gil calificó de "nefasta" la xestión de Pola y acusólu de refugar la so responsabilidá y "echar balones fuera" al "alcordase agora" del mentáu comité. Gil afirmó que Pola ignoró a les compañíes que taben asitiaes n'Asturies y que nun quería dialogar con elles. Nun casu, el diálogu foi imposible, dixo, porque na Conseyería naide sabía falar inglés pa poder comunicase con Easyjet.
"Ustedes crearon un problema dándo-y el monopoliu a deu a Iberia; cuando ustedes van a Madrid, ¿quién-yos paga los billetes?", preguntó-y la parllamentaria al dirixente asturianu. Amás, Gil punxo en cuestión los concursos de promoción turística qu'activó'l Gobiernu. Dixo que contienen clauses "escluyentes". "¿Que pasa si les subvenciones vuelven cayer n'Iberia y en Vueling?", planteó.
Dende Ciudadanos, Armando Fernández Bartolomé tamién llamentó que Pola eche la culpa a les compañíes o utilice la escusa de la falta de competencies, énte una "situación llaceriosa" pola que tienen que pasar los asturianos en materia de conectividá.
Llamentó la falta de presión política del Gobiernu asturianu a la hora de consiguir una solución nesti asuntu. "¿Asturies nun pinta nada?", preguntó-y a Pola. Aportunó Fernández Bartolomé en qu'esti asuntu tien que ser "prioritariu" y que ta afectando a la economía rexonal.
