UVIÉU, 19 Nov. (EUROPA PRESS) -
La campaña entamada pola Dirección Xeneral d'Igualdá del Gobiernu asturianu sobre'l Día Internacional contra la Violencia de Xéneru va centrase anguaño na atención a los fíos de los maltratadores, pa evitar que "la violencia de xéneru pase de xeneración en xeneración".
La directora xeneral d'Igualdá, Nuria Varela, esplicó en rueda de prensa que los menores que ven cómo los sos padres maltraten a les sos madres puen ser "correes de tresmisión pa que la violencia de xéneru pase de xeneración en xeneración". Asina, asegura que la tolerancia a la violencia "cópiase y asonsaña" y deriva en que "en bona midida" los neños van ser "homes maltratadores" y les neñes muyeres maltrataes.
La campaña respuende a una "situación doliosa" pola que nes cases d'acoyida pa muyeres maltrataes yá tán ingresando fíes de muyeres que enantes fueren atendíes por maltratu. Esto, esplicó, foi lo que dio la "voz d'alerta" al Principáu sobre la tresmisión de la violencia.
L'espardimientu d'esta campaña, que va tener como puntu central l'actu institucional en Sama de Llangréu, va realizase al traviés de cartelos y un video ellaboráu con testimonios de víctimes reales que na so infancia sufrieron esti tipu de violencia. Como n'ocasiones anteriores, la Dirección Xeneral d'Igualdá alcordó col Consorciu de Tresportes d'Asturies (CTA) una campaña d'espardimientu na que 175 vehículos van actuar de soporte. Van imprimise amás 42.000 tarxetes de tresporte col lema 'Que la violencia de xéneru nun pase de xeneración en xeneración'.
CÁMARES Y PARAES A DEMANDA NEL CTA, ENANTES QU'ACABE L'AÑU
El Consorciu de Tresportes va collaborar tamién na prevención a la violencia y les agresiones sexuales al traviés de la instalación de cámares nos autobuses y al traviés de la instauración de la parada a demanda p'aquelles persones que la soliciten nos servicios nocherniegos.
Dambes iniciatives, esplicó'l director xeneral del CTA, Carlos González Lozano, van ponese en marcha enantes de qu'acabe l'añu. La instalación de les cámares va entrar en funcionamientu nun primer momentu como esperiencia pilotu en trés autobuses, dos que cubren la llinia Villa-Llaviana y otru que cubra o bien Uviéu-Mieres o Uviéu-Llangréu. La instalación de les cámares yá salió a llicitación con un costu de 15.000 euros y inclúi la instalación d'un botón nel asientu del conductor pa que, en casu de que lo pulsie, les imaxes que se tean grabando nesi momentu vuélquense directamente nos servidores del Consorciu.
Según la evaluación que se realice del programa pilotu, el CTA va valorar estender les filmaciones al restu d'autobuses nocherniegos dependientes del Consorciu.
Sobre les paraes a demanda, va ponese en marcha en tolos autobuses que dependen directamente del Consorciu, y los Conceyos que quieran van poder xuntar los sos servicios urbanos a la midida. La intención ye que les persones que quieren, al xubir al autobús avisen al conductor de que van faer usu de la parada a demanda y se sienten nos asientos delanteros. L'autobús va detenese nel puntu que sía más seguru y la persona, home o muyer, va baxar pola puerta delantera.
380 ATENDÍES EN 2018 EN CASES D'ACOYIDA
El númberu d'ingresos na Rede de Cases d'Acoyida nel añu pasáu xubió a 380 persones, de les que'l 45,52 por cientu foron descendientes de les muyeres que solicitaron ayuda.
En concreto, 196 muyeres y 173 fíos y fíes y 11 persones dependientes ingresaron nos distintos recursos de la rede. La media d'ocupación, según los datos del Principáu, foi del 100% en siete meses.
Sobre la ocupación en pisos tutelaos, en 2018 18 muyeres y 26 fíes y fíos foron beneficiaries del serviciu.
