La conseyería espera que la reorganización del presupuestu permita establecer sinerxes nel sector
UVIÉU, 8 Oct. (EUROPA PRESS) -
La conseyera de Cultura, Política Llingüística y Turismu, Berta Piñán, señaló esti xueves qu'al traviés del diálogu coles distintes pates de la industria cultural --que van confluyir nel Conseyu de la Cultura Asturiana-- va definise'l modelu cultural nuevu n'Asturies.
Asina lo indicó Piñán na Comisión de Cultura, Política Llingüística y Turismu de la Xunta Xeneral, onde reconoció que la cultura "lleva'l llombu una serie de problemes dende hai años", polo que merez un debate más ampliu que la evaluación de les midíes urxentes puestes en marcha pa facer frente a la situación que provocó nel sector la crisis sanitaria.
Nesi sentíu, la conseyera mentó la necesidá de definir un "modelu cultural nuevu n'Asturies" al traviés del diálogu en meses sectoriales colos distintos ámbitos del sector --dende los videoxuegos a la cultura tradicional--. Unes meses que van confluyir nel futuru Conseyu de la Cultura Asturiana.
Pel momentu yá se constituyó la mesa de les artes escéniques y el d'instituciones culturales va principiar la so andadura la selmana próxima. El restu van empezar la so actividá a lo llargo d'esta seronda
La respuesta de la conseyera vieno depués d'una entruga del diputáu de Podemos Asturies Rafael Palacios, que reclamó poner "enriba la mesa" la necesidá de que n'Asturies la cultura sía, xunto la sanidá y la educación, un pegollu central". Por eso, reclamó la ellaboración d'un Plan de Reconstrucción del Sector Cultural Asturianu y un presupuestu mayor nes cuentes autonómiques próximes.
INDUSTRIA CULTURAL
Per otru llau, Piñán señaló que la reorganización del presupuestu de la so cartera busca establecer "sinerxes" nel sector cultural y que les ayudes puestes en marcha depués del confinamientu quieren llegar "a tola cadena de valor" de la industria cultural.
Amás, afirmó que n'Asturies la cultura ye segura gracies a los protocolos sanitarios puestos en marcha dende l'Executivu, "que munches veces foron pioneros y allabaos por otres comunidaes autónomes".
Nesi sentíu, recordó que tolos díes na rexón tán celebréndose actos culturales y que midíes como la convocatoria de proyectos audiovisuales n'asturianu o gallego-asturianu pa RTPA, a la que se van destinar 133.800 euros, supunxo un "apoyu y estímulu" al sector que recibió esta convocatoria como "una ayuda perimportante".
"La reorganización del presupuestu cultural busca crear sinerxes nel sector cultural y que les ayudes sían recibíes en tola cadena de valor", destacó Piñán.
La conseyera realizaba estes declaraciones énte una entruga del diputáu de Foru Pedro Leal, sobre cómo preven recomponer el presupuestu destináu a cultura p'amenorgar les perdes del sector por esta crisis.
Nesi sentíu, el diputáu afirmó que na normalidá nueva "nun ye lo mesmo tener una Asturies zarrada qu'una Asturies segura", polo que defendió cambios presupuestarios p'apoyar al sector cultural.
Per otru llau, Piñán esplicó que la Conseyería recibió 299 solicitúes pa l'ayuda directa puesta en marcha pol Principáu pa los trabayadores de la industria cultural que nun entraben dientro de les ayudes estatales. La mesma tuvo dotada con 500.000 euros.
