UVIÉU, 23 Oct. (EUROPA PRESS) -
El presidente del Principáu, el socialista Adrián Barbón, anunció esti vienres que va solicitar al Gobiernu central l'aplicación del estáu d'alarma n'Asturies pa restrinxir la movilidá nocherniega na comunidá autónoma.
Amás, pola situación epidemiolóxica y la medría de casos, va decretase'l zarru perimetral de les trés grandes ciudaes asturianes --Uviéu, Xixón y Avilés-- dende les 0.00 d'esta nueche hasta'l 6 de payares.
Les salíes y entraes a estes ciudaes van tar prohibíes y controlaes poles Fuercies y Cuerpos de Seguridá del Estáu y la policía Local --sacantes que sía por motivos de fuercia mayor o necesidá, como trabayu, estudios o ayuda a persones dependientes--.
Tamién se va establecer el zarru de tola actividá comercial a partir de les 22.00 hores y de la hostelería y l'ociu a les 23.00 hores --anque la hostelería nun va poder aceptar veceros nuevos a partir de les 22.00 hores--.
Per otru llau, habrá midíes pa evitar concentraciones nel tresporte públicu, los eventos deportivos van realizase ensin públicu, van evitase los congresos y xuntes pa favorecer que sían de forma telemática y dende'l Principáu van tomase midíes pa favorecer el teletrabayu.
Toes estes midíes, polo tanto, van entrar a valir a les 0.00 hores y espérase la so publicación nel BOPA a lo llargo d'esta tarde.
L'Executivu tamién va solicitar una valoración xurídica del Tribunal Superior de Xusticia pa poder establecer el toque de queda ente les 0.00 y les 6.00 hores. Por eso, esta midida nun ta a valir, yá que depende de la seguridá xurídica qu'estableza l'estáu d'alarma y el mesmu TSXA.
Asina lo anunció'l presidente en rueda de prensa depués de la xunta del Comité de Crisis, na que tamién comparecieron el conseyeru de Salú, Pablo Fernández Muñiz, y el director xeneral de Salú Pública, Rafael Cofiñu.
El xefe del Executivu asturianu faló esta mañana col presidente del Gobiernu central, Pedro Sánchez, y col ministru de Sanidá, Salvador Illa, p'anuncia-y la solicitú. Barbón va firmala esta mesma tarde y espera que la declaración del estáu d'alarma n'Asturies, que depende d'una xunta del Conseyu de Ministros, sía lo más ceo posible.