UVIÉU, 29 Oct. (EUROPA PRESS) -
La portavoz del Gobiernu y conseyera de Derechos Sociales y Bienestar, Melania Álvarez, valoró esti xueves la "disposición al diálogu" mostrada polos grupos parllamentarios de Ciudadanos, Podemos Asturies, IX y Foru Asturies nel Debate d'Orientación Política.
Na rueda de prensa posterior al Conseyu de Gobiernu aprovechó pa realizar una valoración de les dos xornaes del debate sobre l'estáu de l'autonomía, que va concluyir esti vienres cola votación de 162 propuestes de resolución, depués de que se retiraren cinco porque taben repetíes.
P'Álvarez, el debate permitió "estremar ente los grupos que tán al altor de les circunstancies y los que tán tovía nel partidismu". La portavoz recordó qu'Asturies vive la situación "más grave dende la Guerra Civil" y parafrasió a Mandela pa indicar que "siempre ye'l momentu afayadizu pa facer les coses bien".
Nesi sentíu, recordó que la selmana que vien empiecen les negociaciones pa los presupuestos autonómicos del 2021 "colos grupos que defenden l'estáu autonómicu", polo que'l Gobiernu socialista dexa fuera de la negociación a Vox.
